કોટાંબી સ્ટેડિયમમાં ગ્રાસ ટોપ વિકેટ માટે કરોડો ખર્ચાશે, 18 KM લાંબી પાઈપલાઈનનું નિર્માણ થશે

વડોદરાઃ શહેરના ક્રિકેટ રસિકો માટે સારા સમાચાર સામે આવી રહ્યા છે. વડોદરામાં પણ હવે ઈન્ટરનેશનલ ક્રિકેટ મેચની મજા માણી શકશે. કોટાંબીમાં બની રહેલા ઈન્ટરનેશનલ ક્રિકેટ સ્ટેડિયમની જાળવણી માટે ખાસ તૈયારીઓ હાથ ધરવામાં આવી છે. અહીં ક્રિકેટર્સને આંતરરાષ્ટ્રીય પિચો પર રમવાનો અનુભવ પણ થઈ શકે છે. અહીં તેમના માટે ગ્રિન ગ્રાસ ટોપ વિકેટના નિર્માણ માટે ખાસ તૈયારીઓ હાથ ધરાઈ છે. આ ઘાસની જાળવણી માટે પાણી સહિતની સુવિધામાં બરોડા ક્રિકેટ એસોસિએશન (BCA) તોતિંગ રૂપિયા ખર્ચશે.

પાણીની લાઈન માટે ખર્ચાશે કરોડો રૂપિયા

બરોડા ક્રિકેટ એસોસિએશન દ્વારા 18 KM રૂટ પર પાણીની પાઈપ લાઈનની વ્યવસ્થા કરી શકે છે. આમાં કરોડો રૂપિયાનો ખર્ચ થઈ શકે છે. આ પાઈપ લાઈનનું નિર્માણ એવી રીતે કરાશે કે જે નર્મદા કેનાલથી પાણી સીધુ સ્ટેડિયમ સુધી પહોંચાડે. જેથી કરીને અહીં પાણીની સુવિધા અપાઈ શકે.

સ્ટેડિયમના નિર્માણ પહેલા BCAને જાણ નહોતી કે..

મીડિયા રિપોર્ટ્સ પ્રમાણે બરોડા ક્રિકેટ એસોસિએશનને સ્ટેડિયમના નિર્માણ પહેલા પાણીની સમસ્યા અંગે જાણ નહોતી. તેમણે જ્યારે સ્ટેડિયમ માટે કોટાંબીમાં જમીન ખરીદી ત્યારે નહોતી જાણ કે ભૂગર્ભ જળ દ્વારા સ્ટેડિયમની પિચનું નિર્માણ બરાબર નહીં થઈ શકે.

BCA પાસે હવે માત્ર 2 જ વિકલ્પ હતા...

પ્રાપ્ત થતી માહિતી પ્રમાણે BCA પાસે માત્ર 2 જ વિકલ્પ હતા. નર્મદા કેનાલનું પાણી અથવા ટેન્કર દ્વારા પાણી મંગાવવું. જોકે એસોસિએશનના વાઈસ પ્રેસિડન્ટ શિતલ મહેતાએ જણાવ્યું કે અમે પાપઈ લાઈન દ્વારા નર્મદા કેનાલનું પાણી વાપરવાનો નિર્ણય કર્યો છે. આને આગામી ભવિષ્યને ધ્યાનમાં રાખતા જોઈએ તો ટેન્કરમાંથી પાણી ખરીદવાના ખર્ચ કરતા પાઈપલાઈન નાખવી વધુ યોગ્ય રહેશે એમ લાગી રહ્યું છે.

સરકાર દ્વારા અનુમતિ મળી ગઈ..પાઈપ લાઈનના નિર્માણ માટે બરોડા ક્રિકેટ એસોસિએશન દ્વારા અરજી કરાઈ હતી. જે લગભગ એક વર્ષ અગાઉ થઈ હતી. જેને હવે ગ્રિન સિગ્નલ મળી ગયું છે. હવે આગળ આ અંગે કાર્યવાહી હાથ ધરાશે. આ પાઈપ લાઈન નાખવા માટે એસોસિએશનને 18 કરોડ રૂપિયા સુધીનો ખર્ચ થઈ શકે છે. જ્યારે પાણીનો પુરવઠો ચાલુ થયા પછી દર વર્ષે 30 લાખ રૂપિયા ગુજરાત પાણી પુરવઠા નિગમને આપવાના રહેશે.