દીપક ચહરની કમાલ, ત્રણ દિવસમાં લીધી બીજી હેટ્રિક!

નવી દિલ્હી: ફાસ્ટ બોલર દીપક ચહરે રવિવારે બાંગ્લાદેશ વિરુદ્ધ રમાયેલી ત્રીજી અને શ્રેણીની અંતિમ ટી20 ઈન્ટરનેશનલમાં હેટ્રિક લઈને ઈતિહાસ રચી દીધો હતો. તે ભારત તરફથી હેટ્રિક લેનારો પ્રથમ બોલર બની ગયો. હવે ચહરે ત્રણ દિવસના ગાળામાં જ વધુ એક હેટ્રિક લઈ લીધી છે. રાજસ્થાન તરફથી રમતા ચહરે મંગળવારે તિરુવનંતપુરમમાં વિદર્ભ વિરુદ્ધ સૈયદ મુશ્તાક અલી ટ્રોફીમાં હેટ્રિક લીધી છે. 27 વર્ષીય ચહરે પ્રભાવશાળી બોલિંગ કરતા 3 ઓવરમાં 18 રન આપી ચાર વિકેટ ઝડપી. તેની બોલિંગની મદદથી રાજસ્થાને વિદર્ભને 9 વિકેટે 99 રન પર જ રોકી દીધું. ચહરની હેટ્રિકમાં દર્શન નાલકંડે, શ્રીકાંત વાઘ અને અક્ષય વાડકરની વિકેટો શામેલ હતી. આ ત્રણેય ચહરે 13મી ઓવરની ચોથા, પાંચમા અને છઠ્ઠા બોલ પર આઉટ કર્યા. ઉલ્લેખનીય છે કે, ચહરે રવિવારે ટી20 ઈન્ટરનેશનલમાં સર્વશ્રેષ્ઠ પ્રદર્શન કરતા વર્લ્ડ રેકોર્ડ બનાવ્યો હતો. તેણે માત્ર સાત રન આપી છ વિકેટ લીધી હતી. તેની ધારદાર બોલિંગની મદદથી ભારતે ત્રણ મેચની સીરિઝને 2-1થી જીતી લીધી હતી.