મેન્ટલ હેલ્થની પ્રૉબ્લેમને કારણે ગ્લેન મેક્સવેલે ક્રિકેટમાંથી બ્રેક લીધો

નવી દિલ્હી: ઑસ્ટ્રેલિયાના વિસ્ફોટક ઑલરાઉન્ડર ગ્લેન મેક્સવેલે ક્રિકેટમાંથી છ મહિનાનો બ્રેક લેવાનો નિર્ણય કર્યો છે. તેણે માનસિક સ્વાસ્થ્ય સાથે જોડાયેલી સમસ્યાઓને કારણે આ નિર્ણય લીધો. ટીમના સાયકોલૉજિસ્ટ ડૉક્ટર માઈકલ લૉયડે ગુરુવારે આની જાણકારી આપી. શ્રીલંકા વિરુદ્ધ ત્રીજી ટી20 ઈન્ટરનેશનલ માટે ડાર્સી શોર્ટને ટીમમાં શામેલ કરવામાં આવ્યો છે. લૉયડે કહ્યું કે, ‘ગ્લેન મેક્સવેલ માનસિક સ્વાસ્થ્યથી જોડાયેલી સમસ્યાઓનો સામનો કરી રહ્યો છે. પરિણામે તેને ક્રિકેટમાંથી બ્રેક લેવાનો નિર્ણય કર્યો છે. ગ્લેને આ મામલે પહેલ કરતા આ સમસ્યાઓને ઓળખી અને સપોર્ટિંગ સ્ટાફ સાથે વાત કરી.’ મેક્સવેલના નિર્ણય પર તેને ક્રિકેટ બોર્ડ તરફથી ઘણી મદદ મળી. રાષ્ટ્રીય ટીમોના એક્ઝિક્યૂટિવ જનરલ મેનેજર બેન ઑલિવરે કહ્યું કે, ખેલાડીઓ અને સ્ટાફનું સ્વાસ્થ્ય પ્રાથમિકતાનો ભાગ છે. ઑલિવરે કહ્યું કે, ‘અમારા ખેલાડીઓ અને સપોર્ટ સ્ટાફનું સ્વાસ્થ્ય ખૂબ મહત્વપૂર્ણ છે. ગ્લેનને અમારું પૂર્ણ સમર્થન છે. ક્રિકેટ ઑસ્ટ્રેલિયા, ક્રિકેટ વિક્ટોરિયા સાથે મળીને કામ કરશે અને ગ્લેનના સ્વાસ્થ્ય અને ક્રિકેટમાં તેના કમબેકને સુનિશ્ચિત કરશે. અમે બધાને અનુરોધ કરીએ છીએ કે, ગ્લેન અને તેના પરિવારને થોડો અંગત સમય આપવામાં આવે, તેની પ્રાઈવસીનું સન્માન કરવામાં આવે.’ તેમણે કહ્યું કે, ‘તે અમારો ખાસ ખેલાડી છે. ઑસ્ટ્રેલિયન ક્રિકેટ પરિવારનો તે ખાસ હિસ્સો છે. અમે ટૂંક સમયમાં જ તેના કમબેકની આશા રાખીએ છીએ. ગ્લેન અને અમારા ખેલાડીઓની સારસંભાળ રાખવી મહત્વનું છે.’