ડે-નાઈટ ટેસ્ટઃ વિરાટ કોહલીની સદી, બાંગ્લાદેશ સામે ભારતને જંગી સરસાઈ

કોલકાતાઃ સુકાની વિરાટ કોહલીની ઐતિહાસિક સદીની મદદથી ભારતે ઈડન ગાર્ડન્સ ખાતે રમાઈ રહેલી ડે-નાઈટ ટેસ્ટ ક્રિકેટ મેચમાં બાંગ્લાદેશ સામે પોતાની સ્થિતિ મજબૂત કરી લીધી છે. ભારતે નવ વિકેટે 347 પોતાનો પ્રથમ દાવ ડિકલેર કર્યો છે. આ સાથે ભારતે 241 રનની જંગી સરસાઈ પણ મેળવી લીધી છે. બાંગ્લાદેશનો પ્રથમ દાવ 106 રનમાં સમેટાઈ ગયો હતો. કોહલીએ ડે-નાઈટ ટેસ્ટમાં સદી નોંધાવનારો ભારતનો પ્રથમ ક્રિકેટર બન્યો છે. ટેસ્ટમાં આ કોહલીની 27મી સદી તથા સુકાની તરીકે 21મી સદી છે. તેણે સુકાની તરીકે સૌથી વધુ ટેસ્ટ સદી નોંધાવવાના ઓસ્ટ્રેલિયાના રિકી પોન્ટિંગના રેકોર્ડને તોડી નાંખ્યો હતો. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો ભારત અને બાંગ્લાદેશ પિન્ક બોલથી પ્રથમ વખત ટેસ્ટ રમી રહ્યા છે. શુક્રવારે મેચના પ્રથમ દિવસે ભારતીય ઝડપી બોલર્સનો દબદબો રહ્યો હતો. ઈશાન્ત શર્માએ પાંચ, ઉમેશ યાદવે ત્રણ અને મોહમ્મદ શમીની બે વિકેટ ઝડપી હતી. બાંગ્લાદેશ પ્રથમ દાવમાં 106 રનમાં આઉટ થઈ ગયું હતું. શનિવારે બીજા દિવસે વિરાટ કોહલીએ શાનદાર સદી નોંધાવતા 194 બોલમાં 18 ચોગ્ગાની મદદથી 136 રનની ઈનિંગ્સ રમી હતી. દિવસની શરૂઆતમાં તેણે 59 રનના સ્કોરથી કરી હતી અને બાદમાં પોતાની સદી પૂરી કરી હતી. બીજા દિવસે બીજા સત્રમાં ભારતે ઝડપથી વિકેટો ગુમાવી દીધી હતી. કોહલી આઉટ થઈ ગયા બાદ રવીન્દ્ર જાડેજા 12 અને રવિચંદ્રન અશ્વિન નવ રન નોંધાવીને પેવેલિયન પરત ફર્યા હતા. ઉમેશ યાદવ અને ઈશાન્ત શર્મા ખાતુ ખોલાવ્યા વગર આઉટ થયા હતા. ભારતે બાદમાં પ્રથમ દાવ ડિકલેર કરવાની જાહેરાત કરી હતી. ત્યારે રિદ્ધિમાન સહા 12 અને મોહમ્મદ શમી 10 રને રમતમાં હતા. બાંગ્લાદેશ માટે અલ-અમીન હુસૈને ત્રણ અને ઈબાદત હુસૈને ત્રણ-ત્રણ વિકેટ ઝડપી હતી. જ્યારે અબુ જાયેદને બે સફળતા મળી હતી. ભારત માટે ચેતેશ્વર પૂજારાએ 55 અને અજિંક્ય રહાણેએ 51 રનનું યોગદાન આપ્યું હતું.