જ્યારે સચિન-હરભજન પ્રથમ વખત મળ્યા હતા ત્યારે થઈ હતી આવી 'ગેરસમજ'

કોલકાતાઃ ભારત અને બાંગ્લાદેશ વચ્ચે કોલકાતાના ઐતિહાસિક ઈડન ગાર્ડન્સ મેદાન પર શુક્રવારે ડે-નાઈટ ટેસ્ટનો પ્રારંભ થયો છે. આ પ્રસંગે ભારતીય ક્રિકેટની દિગ્ગજો પણ હાજર રહ્યા છે અને મેચ દરમિયાન તેમણે પોતાની જૂની યાદો વાગોળી હતી. મેચના પ્રથમ સત્ર બાદ મેચનું પ્રસારણ કરી રહેલી ચેનલે ભારતના દિગ્ગજ ક્રિકેટર્સ વચ્ચે એક ખાસ કાર્યક્રમ રાખ્યો હતો. જેમાં સચિન તેંડુલકર અને હરભજન સિંઘે પોતાની પ્રથમ મુલાકાત દરમિયાન થયેલી ગેરસમજનો ખુલાસો કર્યો હતો. સચિને જણાવ્યું હતું કે જ્યારે હરભજન સિંઘ સાથે મારી મુલાકાત થઈ ત્યારે તે મોહાલીનું મેદાન હતું જ્યાં ટીમ ઈન્ડિયા પોતાની એક મેચ રમવા માટે ગઈ હતી. મેચ પહેલા નેટ સેશન ચાલી રહ્યું હતું અને પંજાબનો આ (હરભજન) બોલર મને સ્પિન બોલિંગની પ્રેક્ટિસ કરાવી રહ્યો હતો. નોંધનીય છે કે હરભજન ત્યારે ઘરેલુ ક્રિકેટ રમતો હતો અને તે એક ઊભરતા ક્રિકેટર તરીકે તૈયાર થઈ રહ્યો હતો. સચિને જણાવ્યું કે જ્યારે નેટ્સમાં અમે પ્રેક્ટિસ કરી રહ્યા હતા ત્યારે હરભજન ઘણી વખત બોલિંગ કરતી વખતે મારી પાસે આવતો હતો અને કહેતો હતો બોલો પાજી જી. હું તેને કહેતો હતો કે જઈને બોલિંગ કર. આવું ઘણી વખત થયું હતું પરંતુ મને ખબર પડી ન હતી. ઘણા વર્ષો બાદ ભજ્જી ટીમ ઈન્ડિયામાં આવ્યો અને તેણે પોતાનું સ્થાન સુનિશ્ચિત કરી લીધું હતું. ત્યારે તેણે મને આ વાતનો ખુલાસો કર્યો હતો કે પ્રથમ મુલાકાતમાં તેને શું ગેરસમજ થઈ હતી, તેમ સચિને ઉમેર્યું હતું. હરભજને ત્યારે સચિનને તે પ્રસંગ યાદ કરાવ્યો હતો અને ત્યારે સચિનને ખ્યાલ આવ્યો હતો કે ત્યારે શું થયું હતું. હરભજનને સચિનને જોતા-જોતા સમજાયું હતું કે સચિન તેને પોતાની પાસે બોલાવતો ન હતો. હકિકતમાં બેટિંગ સમયે પોતાનું ગાર્ડ લેતા પહેલા તે હેલમેટ સેટ કરવા માટે પોતાના માથાથી ઝટકો મારતો હતો. સચિન જેટલી વખત આવું કરતો હતો ત્યારે હરભજનને લાગતું હતું કે તે ઈશારા દ્વારા તેને પોતાની પાસે બોલાવી રહ્યો છે. તેથી હરભજન બોલિંગ છોડીને સચિન પાસે જતો રહેતો હતો. સચિને કહ્યું હતું કે જ્યારે હરભજન ટીમ ઈન્ડિયાનો નિયમિત સભ્ય બન્યો હતો ત્યારે મારી સાથે મુક્ત મને વાતો કરતો હતો. તેણે ફરીથી મને યાદ અપાવ્યું હતું કે શા માટે તે વારંવાર બોલિંગ છોડીને મારી પાસે આવી જતો હતો. નોંધનીય છે કે હરભનજ માટે ઈડન ગાર્ડન્સનું મેદાન યાદગાર રહ્યું છે. આ જ મેદાન પર તેણે ઓસ્ટ્રેલિયા સામે હેટ્રિક ઝડપી હતી અને ભારતને ઐતિહાસિક વિજય અપાવવામાં મહત્વની ભૂમિકા ભજવી હતી. આ કાર્યક્રમમાં સચિન અને હરભજન ઉપરાંત વીવીએસ લક્ષ્મણ અને અનિલ કુંબલે પણ હાજર હતા.