IPLની ઓપનિંગ મેચમાં ચેન્નઈનો RCB સામે 7 વિકેટે આસાન વિજય

I am Gujarat

CSKનો આસાન વિજય

ડિફેન્ડિંગ ચેમ્પિયન ચેન્નઈ સુપરકિંગ્સે પોતાના હોમ ગ્રાઉન્ડ એમ એ ચિદમ્બરમ સ્ટેડિયમ ખાતે રમાયેલી IPL 2019ની પ્રારંભિક મેચમાં રોયલ ચેલેન્જર્સ બેંગ્લોરને 7 વિકેટે હરાવી લીગમાં વિજયી પ્રારંભ કર્યો છે. 71 રનના સાધારણ ટાર્ગેટનો પીછો કરતા ચેન્નઈએ 3 વિકેટ ગુમાવી 17.4 ઓવરમાં જીત મેળવી લીધી હતી. ચેન્નઈ તરફથી અંબાતી રાયુડૂએ સૌથી વધુ 28 રન બનાવ્યા હતા. સુરેશ રૈનાએ પણ 19 રનનું યોગદાન આપ્યું હતું.

ચેન્નઈના સ્પિનર્સ સામે RCB પસ્ત

અગાઉ હરભજન સિંહ, ઈમરાન તાહિર અને રવીન્દ્ર જાડેજાની ઘાતક બોલિંગ સામે બેંગ્લોરની ટીમ સદંતર ફ્લોપ રહી હતી. પાર્થિવ પટેલ (29) સિવાય અન્ય કોઈ બેટ્સમેન ડબલ ફિગર સુધી પહોંચી શક્યો નહોતો. હરભજન અને તાહિરે ત્રણ-ત્રણ જ્યારે રવીન્દ્ર જાડેજાને બે અને ડ્વેન બ્રાવોને એક વિકેટ મળી હતી.

કોહલી, ડિ વિલિયર્સ ફેલ

અગાઉ CSKના કેપ્ટન ધોનીએ ટૉસ જીતીને પ્રથમ ફિલ્ડીંગનો નિર્ણય લીધો જે સાચો સાબિત થયો. ઈનિંગની ચોથી જ ઓવરમાં હરભજને કોહલી (6)ને આઉટ કરી મોટી સફળતા મેળવી. બાદમાં છઠ્ઠી ઓવરમાં મોઈન અલી (9) અને આઠમી ઓવરમાં એબી ડિ વિલિયર્સ(9)ને આઉટ કરી તેણે RCBની કમર જ તોડી નાખી. તેના પછી ઈમરાન તાહિર અને રવીન્દ્ર જાડેજાએ મોરચો સંભાળતા સતત વિકેટો ઝડપી. એક છેડેથી પાર્થિવ પટેલ પ્રતિકાર કરતો રહ્યો પણ તે ટીમને વધારે દૂર લઈ જઈ શક્યો નહીં. અંતે 2.5 ઓવર બાકી રહેતા RCB માત્ર 70 રન પણ સમેટાઈ ગયું.

CSKની વિજયી શરૂઆત

જણાવી દઈએ કે, ચેન્નઈ સુપરકિંગ્સ ગત વર્ષે IPL ચેમ્પિયન બની હતી. જ્યારે RCB સેમી ફાઈનલમાં જ અટકી ગઈ હતી. ચેન્નઈની ટીમે પોતાના અગાઉના પ્રદર્શનને જાળવી રાખતા ધમાકેદાર શરૂઆત કરી હોવાના સંકેત આપી દીધા છે.