4 મેચ હાર્યા બાદ પંજાબને આવી ક્રિસ ગેઈલની યાદ, બેટિંગ કોચે જણાવ્યું - ક્યારે મળશે તક

કિંગ્સ ઈલેવન પંજાબની ટીમના બેટિંગ કોચ વસીમ જાફરનું માનવું છે કે, ટીમના દિગ્ગજ બેટ્સમેન ક્રિસ ગેઈલ અને મુજિબ ઝારદાનને પ્લેઈંગ ઈલેવનમાં ટૂંક સમયમાં જ તક મળશે. ટીમ નથી ઈચ્છતી કે, આ ખેલાડીઓને મેચમાં ત્યારે સ્થાન મળે જ્યારે પ્લેઑફમાં પહોંચવા માટે તેને દરેક મેચ જીતવી જરૂરી હોય. પંજાબની ટીમ અત્યાર સંઘર્ષ કરી રહી છે અને પાંચમાંથી ચાર મેચોમાં તેને હાર મળી છે. બીજી તરફ ડેથ ઓવર્સમાં બોલિંગ પણ ટીમ માટે ચિંતાનો વિષય છે.

વસીમ જાફરે કહ્યું કે, અમારું અત્યાર સુધીનું અભિયાન નિરાશાજનક રહ્યું છે પણ બધું બદલાવામાં એકથી બે ગેમ લાગશે. તેણે કહ્યું કે, આવું થવા માટે ટીમમાં વધુમાં વધુ મેચ વિનર પ્લેયર્સ હોવા જોઈએ. જાફરે આમાં ગેઈલને પણ જોડ્યો અને કહ્યું કે, હવે ગેઈલ અને સ્પિનર મુજિબ ટૂંક સમયમાં રમતા જોવા મળશે.આવું જલ્દી થવું જોઈએ. અમે તેમને એ સ્થિતિમાં ટીમમં લાવવા નથી માગતા જ્યારે દરેક મેચ જીતવાની જરૂરિયાત હોય. અમે આશા કરીએ છીએ કે, તે બંને જલ્દી રમતા જોવા મળશે.

જાફરે કહ્યું કે, 41 વર્ષીય કેરેબિયન બેટ્સમેન સારી સ્થિતિમાં છે અને ટીમ માટે પોતાનું કામ કરવા માટે આતુર છે. તે ઘણી સારી ટ્રેનિંગ કરી રહ્યો છે અને નેટ્સમાં પણ ઘણો શાનદાર દેખાઈ રહ્યો છે. તે ટીમ માટે મહત્વપૂર્ણ ખેલાડી છે અને અમે જાણીએ છીએ કે, તે શું કરી શકે છે. તે રન બનાવવા માટે ભૂખ્યો છે અને આ અમારા માટે સારા સંકેત છે મને આશા છે કે, તે ટૂંક સમયમાં જ રમશે કારણ કે અમારે મેચ વિનરની જરૂર છે અને તે પણ જેટલા વધુમાં વધુ થઈ શકે. અમારે માત્ર આગામી મેચ માટે નહીં પરંતુ આખી ટૂર્નામેન્ટના બાકી બચેલી મેચો માટે તેના જેવા પ્લેયર્સની જરૂર છે અને ગેઈલ ટીમ માટે 4-5 મેચ સરળાતથી પોતાના દમ પર જીતાડી શકે છે.


જાફરે કહ્યું કે, તેની ટીમને ટૉપ-4માં પહોંચવા માટે 9માંથી સાત મેચો જીતવાની જરૂર છે. જોકે, આ મુશ્કેલ છે પરંતુ અશક્ય નહીં. તેણે કહ્યું કે, નિકોલસ પૂરન અને ગ્લેન મેક્સવેલ પ્લેઈંગ ઈલેવનમાં જરૂર હશે, આવામાં આવામાં ગેઈલ અને મુજિબ માટે જગ્યા બનાવવી પડશે. તમને જણાવી દઈએ કે, પંજાબે 5માંથી 4 મેચો ગુમાવી છે અને તે પૉઈન્ટ્સ ટેબલમાં સૌથી તળિયે છે.