મુંબઈની જીત પછી નીતા અંબાણી મેદાનમાં પહોંચ્યા, રોહિત શર્માને આપી તાળીઓ

દુબઈમાં 50 દિવસ કરતા લાંબા સમય માટે કરવામાં આવેલા IPL 2020 આયોજનનો અંત આવ્યો છે. IPLની 13મી સીઝનની ફાઈનલ મેચ મુંબઈ ઈન્ડિયન્સ (Mumbai Indians) અને દિલ્હી કેપિટલ્સ (Delhi Capitals) વચ્ચે રમાઈ હતી, જે મુંબઈએ શાનદાર પ્રદર્શન કરીને 5 વિકેટ સાથે જીતી લીધી છે. આ સાથે મુંબઈ IPLમાં પાચમી વખત ચેમ્પિયન બન્યું છે. આ મેચ જોવા માટે નીતા અંબાણી (Nita Ambani) અને દીકરો આકાશ અંબાણી (Aakash Ambani) પણ પહોંચ્યા હતા.

IPLની ફાઈનલ મેચ જોવા માટે ગ્રાઉન્ડ પર પહોંચેલા નીતા અંબાણી મુંબઈની જીત બાદ દીકરા સાથે ગ્રાઉન્ડ પર પહોંચ્યા હતા. નીતા અંબાણીએ રોહિત શર્માના હાથમાં ઘણી બધી તાળીઓ આપી હતી અને આકાશ અંબાણીએ રોહિત શર્માને પાછળથી પકડી લીધો હતો. સોશિયલ મીડિયા પર આકાશ અને નીતા અંબાણીએ મેદાન પર પહોંચીને જે રીતે ઉજવણી કરી તેનો વિડીયો સોશિયલ મીડિયા પર વાયરલ થઈ રહ્યો છે. આ વિડીયો બન્ને જણા ઘણાં જ ખુશ-ખુશ દેખાઈ રહ્યા છે.



દિલ્હી કેપિટલ્સે નોંધાવ્યો 156 રનનો સ્કોર

કેપ્ટન શ્રેયસ ઐય્યર તથા રિશભ પંતની આક્રમક અડધી સદીની મદદથી દિલ્હી કેપિટલ્સે આઈપીએલ ટી20 ક્રિકેટ ટુર્નામેન્ટની 13મી સિઝનની ફાઈનલમાં મુંબઈ ઈન્ડિયન્સ સામે 157 રનનો લક્ષ્યાંક મૂક્યો હતો. આઈપીએલમાં પ્રથમ વખત ફાઈનલમાં પહોંચેલી દિલ્હીની ટીમના કેપ્ટન શ્રેયસ ઐય્યરે ટોસ જીતીને પ્રથમ બેટિંગનો નિર્ણય કર્યો હતો. જોકે, તેના ટોપ ઓર્ડરનો ધબડકો થયો હતો પરંતુ ઐય્યર અને પંતની જોડીએ બાજી સંભાળી લેતા દિલ્હીએ નિર્ધારીત 20 ઓવરમાં 156 રનનો સ્કોર નોંધાવ્યો હતો.

રોહિત શર્માની ધમાકેદાર અડધી સદી

મુંબઈ સામે 157 રનનો લક્ષ્યાંક હતો પરંતુ કેપ્ટન રોહિત શર્માની ધમાકેદાર અડધી સદીએ આ લક્ષ્યાંકને આસાન બનાવી દીધો હતો. તેણે અને સાથી ઓપનર ક્વિન્ટન ડીકોકે ટીમને મજબૂત શરૂઆત અપાવી હતી. આ જોડીએ 4.1 ઓવરમાં જ 45 રનની ભાગીદારી નોંધાવી દીધી હતી. ડીકોક 12 બોલમાં 20 રન નોંધાવીને આઉટ થયો હતો. ત્યારબાદ સૂર્યકુમાર યાદવે 19 રનનું યોગદાન આપ્યું હતું. રોહિત શર્માએ 51 બોલમાં પાંચ ચોગ્ગા અને ચાર સિક્સરની મદદથી 68 રનની ઈનિંગ્સ રમી હતી. આ ઉપરાંત ઈશાન કિશને 19 બોલમાં ત્રણ ચોગ્ગા અને એક સિક્સરની મદદથી અણનમ 33 રન નોંધાવ્યા હતા. દિલ્હી માટે એનરિચ નોર્ટજેએ બે તથા કાગિસો રબાડા અને માર્ક્સ સ્ટોઈનિસે એક-એક વિકેટ ઝડપી હતી.