IPL: સળંગ બે પરાજય બાદ ચેન્નઈ આજે હૈદરાબાદ સામે વિજય નોંધાવવા આતુર

ત્રણ વખતની ચેમ્પિયન ટીમ ચેન્નઈ સુપર કિંગ્સ આજે સનરાઈઝર્સ હૈદરાબાદ સામે રમાનારા મુકાબલામાં શાનદાર પ્રદર્શન કરીને વિજયી લય મેળવવા માટે ઉતરશે. આઈપીએલ ટી20 ક્રિકેટ ટુર્નામેન્ટની 13મી સિઝનની ઉદ્ઘાટન મેચમાં મુંબઈ ઈન્ડિયન્સ સામે વિજય નોંધાવ્યા બાદ ચેન્નઈને સળંગ બે પરાજયનો સામનો કરવો પડ્યો હતો. તેથી હૈદરાબાદ સામે ચેન્નઈ વિજય નોંધાવવા આતુર રહેશે. મેચનું પ્રસારણ રાત્રે 7.30 કલાકથી થશે.

ચેન્નઈની ટીમ પોઈન્ટ ટેબલમાં સૌથી નીચેના સ્થાને છે અને કેપ્ટન ધોની તથા કોચ સ્ટેફન ફ્લેમિંગ ચોક્કસથી તેનાથી ચિંતાતુર હશે. જોકે, સામે હૈદરાબાદની પરિસ્થિતિ પણ સારી રહી નથી. ત્રણ મેચમાં હૈદરાબાદ બે મેચ હારી ગયું છે. સનરાઈઝર્સ હૈદરાબાદે પોતાના અભિયાનની શરૂઆત સળંગ બે પરાજયથી કરી હતી પરંતુ દિલ્હી ડેરડેવિલ્સ સામે વિજય નોંધાવીને હૈદરાબાદે જીતનું ખાતું ખોલાવ્યું હતું.

ચેન્નઈની ટીમ એક સપ્તાહના બ્રેક બાદ મેદાન પર પરત ફરી રહી છે. ચેન્નઈએ પોતાની છેલ્લી મેચ ગત શુક્રવારે દિલ્હી કેપિટલ્સ વિરુદ્ધ રમી હતી જેમાં તેને 44 રને પરાજયનો સામનો કરવો પડ્યો હતો. મેચ બાદ ચેન્નઈના સુકાની સ્ટેફન ફ્લેમિંગે જણાવ્યું હતું કે તેની ટીમ આ એક સપ્તાહના બ્રેકનો મહત્તમ ઉપયોગ કરશે અને ટીમના પ્રદર્શનનો રિવ્યું કરશે. ન્યૂઝીલેન્ડના ભૂતપૂર્વ કેપ્ટને કહ્યું હતું કે તેને આશા છે કે આ નાનકડા બ્રેકથી ટીમને ફાયદો થશે.

આ મેચમાં ટીમના બે મહત્વના ખેલાડી ડ્વેઈન બ્રાવો અને અંબાતી રાયડૂ પરત ફરે તેવી સંભાવના છે. મુંબઈ સામે રમાયેલી પ્રથમ મેચમાં રાયડૂ રમ્યો હતો પરંતુ બાદમાં હેમસ્ટ્રિંગ ઈજાના કારણે તે ત્યારપછીની બે મેચમાં રમી શક્યો ન હતો. જ્યારે ડ્વેઈન બ્રાવો આ સિઝનમાં હજી સુધી એક પણ મેચ રમ્યો નથી. બ્રાવોને કેરેબિયન પ્રીમિયર લીગ દરમિયાન ઘૂંટણમાં ઈજા થઈ હતી.

ચેન્નઈ માટે સ્પિનર રવીન્દ્ર જાડેજા અને પિયુષ ચાવલાનું ફોર્મ ચિંતાજનક છે. સ્પિન બોલિંગ ચેન્નઈની તાકાત રહી છે પરંતુ હાલમાં આ બંને સ્પિનર્સ સંઘર્ષ કરતા જોવા મળ્યા છે. બીજી તરફ ચેન્નઈ સામે હૈદરાબાદના ઈનફોર્મ સ્પિનર રાશિદ ખાનનો સામનો કરવો પડકાર બની રહેશે. દિલ્હી સામેની મેચમાં રાશિદે 14 રન આપીને ત્રણ વિકેટ ઝડપી હતી.