ન ભૂતો ન ભવિષ્યતિઃ ક્રિસ ગેઈલે IPLમાં ફટકારી 1000 સિક્સર, KXIPનું શાનદાર ટ્રિબ્યૂટ

ટી20 ક્રિકેટમાં 1000 સિક્સ, એ પણ કોઈ એક બેટ્સમેનના નામ પર. તમને પણ બે ઘડી તો તમ્મર આવી ગયા ને? જોકે, આ રેકોર્ડ બનાવ્યો છે ક્રિસ્ટોફર હેન્રી ગેઈલએ. કિંગ્સ ઈલેવન પંજાબના ધુરંધર બેટસમેન ક્રિસ ગેઈલે શુક્રવારે રાજસ્થાન રોયલ્સ સામેના મુકાબલામાં આ ઈતિહાસ રચ્યો હતો. તેણે ક્રિકેટના સૌથી નાના ફોર્મેટમાં 1000 સિક્સ પૂરી કરી હતી.

'યુનિવર્સલ બોસ'ના નામથી ફેમસ ક્રિસ ગેઈલે રાજસ્થાનના બેટ્સમેનોની ખૂબ જ ધોલાઈ કરી હતી. તેણે માત્ર 63 બોલમાં જ 99 રન બનાવ્યા હતાં. તે અંતિમ ઓવરમાં આઉટ થયો અને જોફ્રા આર્ચરે તેને સદી બનાવવા દીધી નહોતી. ગેઈલની ઈનિંગની મદદથી પંજાબે અબુધાબીના શેખ જાયેદ સ્ટેડિયમમાં 4 વિકેટ ગુમાવીને 185 રન બનાવ્યા હતાં.


અબુ ધાબીમાં શરુઆતથી જ ગેઈલ તાબડતોબ ઈનિંગ રમવાનું શરુ કર્યું હતું અને લાંબા શોટ ફટકાર્યા હતાં. તેણે પોતાની ઈનિંગમાં શાનદાર 8 સિક્સર ફટકારી હતી. આર્ચરની ઈનિંગની અંતિમ ઓવરમાં તે ક્લીન બોલ્ડ થતાં પહેલા 7મી આઈપીએલ શતકના રેકોર્ડ માટે તૈયાર લાગતો હતો.
તે ટી20 ક્રિકેટમાં 1000 સિકસર ફટકારનાર એકમાત્ર બેટ્સમેન બન્યો છે. જે લિસ્ટમાં બીજા નંબર પર તેના જ દેશનો ધૂરંધર ઓલરાઉન્ડર કેરોન પોલાર્ડ છે. જેણે અત્યાર સુધીમાં 690 સિક્સર ફટકારી છે.


41 વર્ષનો ગેલ લીગના શરુઆતની 7 મેચથી બહાર રહ્યો હતો. જોકે, જ્યારથી તેણે કમબેક કર્યું છે ત્યારથી પંજાબની ટીમે સળંગ 5 મેચ જીતી છે. ગેલના ઈન્ટરનેશનલ કરિયરની વાત કરીએ તો તેણે 103 ટેસ્ટમાં 7214 રન, 301 વનડેમાં 10480રન અને 58 ટી20 મેચમાં કુલ 1627 રન બનાવ્યા છે.