ક્રિસ ગેઈલનો કોરોના રિપોર્ટ આવ્યો, ઉસૈન બોલ્ટની બર્થ-ડે પાર્ટીમાં થયો હતો સામેલ

હાલમાં જ દુનિયાના સૌથી ઝડપી રનર ઉસૈન બોલ્ટનો કોરોના રિપોર્ટ પોઝિટિવ આવ્યો હતો. બોલ્ટનો 21મી ઓગસ્ટે જન્મદિવસ હતો. તેની બર્થ-ડે પાર્ટીમાં ઘણા મહેમાનો આવ્યા હતા. જેમાંથી એક વિસ્ફોટક બેટ્સમેન ક્રિસ ગેઈલ પણ હતો. જોકે બોલ્ટની પાર્ટીમાં હાજરી આપ્યા બાદ ગેઈલને પણ કોરોનાનું સંક્રમણ થવાની સંભાવના હતી. આ વચ્ચે હવે ક્રિસ ગેઈલે પોતાના કોરોના ટેસ્ટના રિપોર્ટની જાણકારી ફેન્સને આપી છે.

ક્રિસ ગેઈલે IPL રમવા માટે યુએઈ જવા માટે અમુક કલાકો પહેલા પોતાનો બે વખત કોરોના ટેસ્ટ કરાવ્યો હતો. જેમાં તેના બંને રિપોર્ટ નેગેટિવ આવ્યા છે. ગેઈલે તેની જાણકારી ઈન્સ્ટાગ્રામ સ્ટોરીમાં પોસ્ટ કરીને શેર કરી છે. એવામાં હવે તે ટૂંક સમયમાં IPL રમવા માટે કિંગ્સ ઈલેવન પંજાબની ટીમ સાથે યુએઈમાં જોડાઈ શકે છે.


બીજી તરફ ઉસૈન બોલ્ટ કોરોના પોઝિટિવ આવ્યા બાદ સેલ્ફ આઈસોલેશનમાં જતો રહ્યો છે. બોલ્ટે હાલમાં જ પોતાનો 34મો જન્મદિવસ ઉજવ્યો હતો. તેની પાર્ટીમાં ઘણા મહેમાનો સુરક્ષાનું ધ્યાન રાખ્યા વિના સામેલ થયા હતા. તેમણે માસ્ક પણ નહોતું પહેર્યું અને સોશિયલ ડિસ્ટન્સિંગનું પણ ધ્યાન નહોતું રાખ્યું.

ટી-20નો વિસ્ફોટક બેટ્સમેન ક્રિસ ગેઈલે કે.એલ રાહુલની કેપ્ટનશીપમાં આ વખતે આઈપીએલ રમતો જોવા મળશે. જણાવી દઈએ કે ગેઈલે 2019ની આઈપીએલ સીઝનમાં 368 રન બનાવ્યા હતા. આ વખતે પણ ગેઈલ અને રાહુલ ઓપનર તરીકે ધમાલ મચાવવા તૈયાર છે.

ગેઈલે IPLના કરિયરમાં અત્યાર સુધી 125 મેચો રમી છે. આ દરમિયાન તેણે 4484 રન બનાવ્યા છે. ગેઈલે આઈપીએલમાં 6 સદી પણ ફટકારી છે. તે IPLના ઈતિહાસમાં તે સૌથી વધુ સદી ફટકારનાર બેટ્સમેન છે. આ વિસ્ફોટક બેટ્સમેનના નામે 28 અડધી સદી નોંધાયેલી છે.