ચેન્નઈના કોચ ફ્લેમિંગે કહી મોટી વાત, વધી શકે છે કેપ્ટન ધોનીની ચિંતા

શનિવારે ચેન્નઈ સુપર કિંગ્સ ટીમનો સામનો દિલ્હી કેપિટલ્સ સામે હતો. આ મેચ ભારે રોમાંચક અને દિલધડક બની હતી. અંતિમ ઓવરમાં દિલ્હીને જીતવા માટે 17 રનની જરૂર હતી. તેવામાં કેપ્ટન ધોનીએ બ્રાવોના બદલે સ્પિનર રવીન્દ્ર જાડેજાને બોલિંગ આપી હતી. ત્યારે તમામ લોકોને આશ્ચર્ય થયું હતું કે ધોનીએ બ્રાવોના બદલે જાડેજાને શા માટે બોલિંગ આપી હતી. જોકે, બાદમાં બધાને ખબર પડી હતી કે બ્રાવો ઈજાગ્રસ્ત થયો હતો અને તેના કારણે તે મેદાનની બહાર જતો રહ્યો હતો. જાડેજાની ઓવરમાં અક્ષર પટેલે ત્રણ સિક્સર ફટકારીને ચેન્નઈના હાથમાંથી વિજય છીનવી લીધો હતો.

મેચ બાદ ટીમના કોચ સ્ટેફન ફ્લેમિંગે જણાવ્યું હતું કે બ્રાવોને જમણી જાંઘમાં ઈજા થઈ હતી. જેના કારણે તે મેદાનની બહાર ગયો હતો. અંતિમ ઓવર કરવા માટે તે મેદાન પર હાજર ન હતો તેનાથી તે ઘણો જ નિરાશ થયો હતો. ફ્લેમિંગે જણાવ્યું હતું કે તેની ઈજાનું ફરીથી નિરિક્ષણ કરવામાં આવશે. કદાચ તે આગામી કેટલાક સપ્તાહ મેદાનની બહાર રહી શકે છે. બ્રાવો ડેથ બોલર છે અને અંતિમ ઓવર માટે હાજર ન હતો તે કમનીસીબી છે. અમારી સિઝન આ રીતે જઈ રહી છે.

ફ્લેમિંગે જણાવ્યું હતું કે અંતિમ ઓવર રવીન્દ્ર જાડેજા પાસે કરવવાની કોઈ યોજના ન હતી. પરંતુ બ્રાવો ઈજાગ્રસ્ત હતો તેથી અમારી પાસે બીજો કોઈ વિકલ્પ જ ન હતો. અમે અમારા પક્ષમાં આવે તેવી પરિસ્થિતિનું નિર્માણ કર્યું હતું પરંતુ અમારે વધારે મહેનત કરવાનું જારી રાખવું પડશે. આ ઉપરાંત ફ્લેમિંગે મેચમાં સદી ફટકારનારા દિલ્હીના બેટ્સમેન શિખર ધવનની પ્રશંસા કરી હતી. ધવને આઈપીએલમાં પોતાની પ્રથમ સદી ફટકારી હતી.