IPLની આગામી સીઝન થશે મોટા ફેરફાર, ગુજરાતને મળી શકે છે નવી ટીમ

અમદાવાદઃ કોરોના વાયરસની મહામારીની વચ્ચે આ વર્ષે યુએઈમાં સફળતાપૂર્વક IPL 2020નું આયોજન થયું. સમગ્ર ટૂર્નામેન્ટ કોઈપણ પ્રકારના વિવાદ વચ્ચે પૂર્ણ થઈ અને મુંબઈ ઈન્ડિયન્સની ટીમ પાંચમી વખત ટૂર્નામેન્ટ જીતી હતી. કોરોનાની મહામારી વચ્ચે પણ સફળતાપૂર્વક ટૂર્નામેન્ટનું આયોજન કરવા માટે ભારતીય ક્રિકેટ બોર્ડની પણ વિશ્વભરમાં પ્રશંસા થઈ રહી છે. જોકે હવે BCCI આગામી વર્ષના IPLને કેન્સલ કરવાના મૂડમાં નથી. આગામી વર્ષની IPL માટે મેગા ઓક્શન યોજાશે.

બીસીસીઆઈના પ્રમુખ સૌરવ ગાંગુલીએ પહેલા જ સંકેત આપી દીધા હતા કે, આગામી વર્ષે IPL તેના નિયત સમય એટલે કે એપ્રિલ-મે મહિનામાં યોજાશે. એવી પણ શક્યતાઓ છે કે આગામી આઈપીએલ એડીશનમાં નવમી ટીમ સામેલ કરાશે. મોટા ભાગે તો આ નવમી ટીમ ગુજરાતની હશે. અમદાવાદમાં હાલમાં જ મોટેરા સ્ટેડિયમનું બાંધકામ પૂર્ણ થયું છે અને ફ્રેન્ચાઈઝી તેને હોમ ગ્રાઉન્ડ પણ બનાવી શકે છે. રિપોર્ટ્સ મુજબ, આ નવી ટીમ અમદાવાદની હોઈ શકે છે.

IPL ફ્રેન્ચાઈઝીના ઓફિશિયલે TNIEને આપેલા નિવેદનમાં કહ્યું હતું કે, બીસીસીઆઈએ અમને આગામી કેટલાક મહિનામાં ઓક્શન માટે તૈયાર રહેવા કહ્યું છે. જોકે આ હજુ ઓફિશિયલ નથી કે તેમણે અમને તૈયાર રહેવા કહ્યું છે, પરંતુ તેઓ પ્લાનિંગ મુજબ આગળ વધશે. ઉપરાંત એક નવી ટીમ આવી રહી છે, એવામાં ઓક્શન યોજાત તેવી પ્રબળ સંભાવનાઓ છે.

ફ્રેન્ચાઈઝીને ત્રણ મુખ્ય ખેલાડીઓ રિટેઈન કરવાની મંજૂરી છે અને રાઈટ ટુ મેચ ઓપ્શન (RTM) દ્વારા તેઓ વધુ બે ખેલાડીઓને રાખી શકે છે. જો મેગા ઓક્શન દરમિયાન રિટેન્શન પોલિસી પર કોઈ સ્પષ્ટતા થઈ શકી નથી. અન્ય ફ્રેન્ચાઈઝીના ઓફિશિયલે જણાવ્યું હતું કે, હાલના સ્ટેજમાં તમામ ખેલાડીઓને ઓક્શનમાં રાખવું સારું નહીં કહેવાય, એવામાં નવી ટીમ આવે તો પણ રીટેન્શન પોલિસીને ચાલુ રાખવી જોઈએ. ટીમોને પોતાની બ્રાન્ડ વેલ્યૂ સાથે સમાધાન કરવું પડશે, જે તેમના સ્ટાર ખેલાડીઓના આધારે બની છે.

ઉલ્લેખનીય છે કે આગામી વર્ષની IPLમાં જો નવી ટીમ ઉમેરાય છે તો કુલ મેચોની સંખ્યામાં પણ વધારો થઈ શકે છે. ઉપરાંત ગુજરાતની ટીમ આવવાથી રાજ્યના ક્રિકેટ રસિકોમાં પણ વધારે ઉત્સાહ જોવા મળશે. આ પહેલા ચેન્નઈ અને રાજસ્થાનની ટીમને IPLમાંથી બે વર્ષ માટે પ્રતિબંધિત કરાયા બાદ રાજકોટ અને પુણેની ટીમને શામેલ કરાઈ હતી. પરંતુ બંને ટીમો કંઈ ખાસ નહોતી કરી શકી.