IPL: શિખર ધવનની ધમાકેદાર બેટિંગ, દિલ્હીએ પંજાબને હરાવ્યું

શિખર ધવનની ધમાકેદાર બેટિંગની મદદથી દિલ્હી કેટિલ્સે ઈન્ડિયન પ્રીમિયર લીગ ટી20 ક્રિકેટ ટુર્નામેન્ટમાં રવિવારે રમાયેલી મેચમાં પંજાબ કિંગ્સ વિરુદ્ધ છ વિકેટે શાનદાર વિજય નોંધાવ્યો હતો. આઈપીએલ-14મા રવિવારે મુંબઈના વાનખેડે સ્ટેડિયમમાં રમાયેલી મેચમાં દિલ્હીએ ટોસ જીતીને પંજાબ કિંગ્સને પ્રથમ બેટિંગનું આમંત્રણ આપ્યું હતું. કેપ્ટન લોકેશ રાહુલ અને મયંક અગ્રવાલની અડધી સદીની મદદથી પંજાબે નિર્ધારીત 20 ઓવરમાં 4 વિકેટે 195 રનનો સ્કોર નોંધાવ્યો હતો. જેના જવાબમાં દિલ્હી કેપિટલ્સે 18.2 ઓવરમાં 4 વિકેટે 198 રન નોંધાવીને મેચ જીતી લીધી હતી. શિખર ધવને 92 રનની લાજવાબ ઈનિંગ્સ રમી હતી.

શિખર ધવનની ધમાકેદાર બેટિંગ
196 રનના લક્ષ્યાંકને પાર પાડવા ઉતરેલી દિલ્હીની ટીમને શિખર ધવન અને પૃથ્વી શોની જોડીએ અદ્દભુત શરૂઆત અપાવી હતી. બંનેએ શરૂઆતથી જ આક્રમક વલણ અપનાવ્યું હતું. આ જોડીએ 5.3 ઓવરમાં 59 રનની ભાગીદારી નોંધાવી હતી. જોકે, અર્શદીપ સિંહે આક્રમક બેટિંગ કરી રહેલા પૃથ્વી શોને આઉટ કરીને આ જોડી તોડી હતી. શોએ 17 બોલમાં ત્રણ ચોગ્ગા અને બે સિક્સરની મદદથી 32 રન નોંધાવ્યા હતા. જ્યારે ધવન પોતાની સુંદર ઈનિંગ્સથી ટીમને વિજય સુધી દોરી ગયો હતો. જોકે, ટીમ જીતની નજીક આવી હતી ત્યારે તે આઉટ થઈ ગયો હતો. તે આઠ રન માટે પોતાની સદી ચૂકી ગયો હતો. ધવને 49 બોલમાં 92 રન ફટકાર્યા હતા જેમાં 13 ચોગ્ગા અને બે સિક્સર સામેલ હતી.

સ્ટોઈનિસ અને લલિત યાદવનું વિજયી યોગદાન
ધવન આઉટ થયો ત્યારે દિલ્હીનો સ્કોર 15 ઓવરમાં ત્રણ વિકેટે 152 રન હતો. ટીમને જીત માટે 5 ઓવરમાં 45 રનની જરૂર હતી. પરંતુ માર્ક્સ સ્ટોઈનિસે ત્યારે કેપ્ટન રિશભ પંત સાથે મળીને શાનદાર બેટિંગ કરી હતી. 18મી ઓવરના પ્રથમ બોલ પર પંત પણ આઉટ થઈ ગયો હતો. તેણે 16 બોલમાં 15 રન નોંધાવ્યા હતા. સ્ટોઈનિસે 13 બોલમાં ત્રણ ચોગ્ગા અને એક સિક્સર સાથે 27 રનની અણનમ ઈનિંગ્સ રમી હતી. જ્યારે લલિત યાદવ છ બોલમાં 12 રન નોંધાવીને નોટઆઉટ રહ્યો હતો. પંજાબ માટે જ્યે રિચાર્ડસને બે તથા અર્શદીપ સિંહ અને રિલી મેરેડિથને એક-એક સફળતા મળી હતી.

રાહુલ અને અગ્રવાલની સદીની ભાગીદારી
અગાઉ પંજાબ કિંગ્સને કેપ્ટન લોકેશ રાહુલ અને મયંક અગ્રવાલની ઓપનિંગ જોડીએ ધમાકેદાર શરૂઆત અપાવી હતી. તેમણે પ્રથમ વિકેટ માટે સદીની ભાગીદારી નોંધાવીને ટીમ માટે મોટા સ્કોરનો પાયો નાંખ્યો હતો. આ જોડીએ 12.4 ઓવરમાં 122 રનની ભાગીદારી નોંધાવી હતી. લુકમાન મેરિવાલાએ મયંકને આઉટ કરીને આ ભાગીદારી તોડી હતી. મયંક અગ્રવાલે 36 બોલમાં 69 રન નોંધાવ્યા હતા જેમાં 7 ચોગ્ગા અને 4 સિક્સર સામેલ હતી. જ્યારે લોકેશ રાહુલે 51 બોલમાં 7 ચોગ્ગા અને 2 સિક્સરની મદદથી 61 રનની ઈનિંગ્સ રમી હતી.

દીપક હૂડા અને શાહરૂખનું મહત્વનું યોગદાન
જોકે, પંજાબનો વિસ્ફોટક બેટ્સમેન ક્રિસ ગેઈલ વધારે સફળ રહ્યો ન હતો. વર્તમાન સિઝનમાં તે તેની લયમાં જોવા મળ્યો નથી. દિલ્હી સામે તે 9 બોલમાં 11 રન નોંધાવીને આઉટ થયો હતો. જોકે, દીપક હૂડા અને શાહરૂખ ખાને મહત્વનું યોગદાન આપ્યું હતું. દીપક હૂડાએ 13 બોલમાં અણનમ 22 રનની ઈનિંગ્સ રમી હતી જેમાં બે સિક્સર સામેલ હતી. જ્યારે શાહરૂખ ખાન 5 બોલમાં બે ચોગ્ગા અને એક સિક્સરની મદદથી 15 રન નોંધાવીને અણનમ રહ્યો હતો. દિલ્હી માટે ક્રિસ વોક્સ, મેરિવાલા, કાગિસો રબાડા અને અવેશ ખાને એક-એક વિકેટ ઝડપી હતી.