વિરાટ કોહલીની RCBની ટીમને ચેતવણી, કહ્યું - એક ભૂલથી ટૂર્નામેન્ટ થઈ જશે બરબાદ

દુબઈ : ઈન્ડિયન પ્રીમિયર લીગ (IPL) માટે તમામ 8 ટીમો UAE પહોંચી ગઈ છે. ટીમોના ખેલાડીઓ અહીં પોત-પોતાના રૂમમાં ક્વૉરન્ટાઈન છે. રૉયલ ચેલેન્જર્સ બેંગ્લોર (RCB)ની વર્ચ્યુઅલ ટીમ મીટિંગ થઈ, જેમાં કેપ્ટન વિરાટ કોહલીએ સાથી ખેલાડીઓને જરૂરી પ્રોટોકૉલ્સ સખ્તાઈથી પાલન કરવાની સલાહ આપી છે. IPL-2020નું આયોજન UAEમાં કરવામાં આવી રહ્યું છે જે 19 સપ્ટેમ્બર 10 નવેમ્બર સુધી રમાશે.

એક ભૂલથી ટૂર્નામેન્ટ થઈ શકે છે બરબાદ

કેપ્ટન કોહલીએ કહ્યું કે - આપણે બધાએ તે નિયમો ફોલો કરવા પડશે જે UAEમાં અધિકારીઓએ બનાવ્યા છે અને હું આશા રાખું છું કે બધા લોકો બાયો પ્રોટોકૉલ્સને સંપૂર્ણ રીતે ફોલો કરશે અને સુરક્ષા અંગે કોઈપણ બાબતે ઢીલ નહીં વર્તે. તેમણે કહ્યું કે, 'હું માનું છું કે, આપણી એક ભૂલથી આખી ટૂર્નામેન્ટ બરબાદ થઈ શકે છે અને મને લાગે છે એવું કોઈ નહીં ઈચ્છે.'

બધાએ કરવું પડશે યોગદાન

વિરાટે કહ્યું કે - આપણે એ સમજવું પડશે કે, આપણે આ સુરક્ષા ઘેરાને યથાવત રાખીએ. ભારતીય કેપ્ટને પહેલા જ દિવસ સારું ટીમ કલ્ચર વિકસાવવા આવશ્યકતા પર ભાર મૂક્યો. તેણે કહ્યું કે, 'હું મારા પ્રેક્ટિસ સેશનમાં પહોંચવાની રાહ જોઈ શકતો નથી પણ આપણે બધા એવું કરી રહ્યા છીએ. આવામાં આપણી પાસે પહેલા દિવસથી જ સારું ટીમ કલ્ચર બનાવવાની તક છે. મને લાગે છે કે, આપણે બધાએ આના માટે યોગદાન આપવું પડશે, સૌથી પહેલા ટીમમાં સીનિયર્સે. એટલે યોગ્ય નોટ પર બાબતોને શરૂ કરો.'

જો જાણી-જોઈને ભૂલ કરી તો...

RCBના ક્રિકટ ઑપરેશન્સના ડિરેક્ટર માઈક હેસન અને હેડ કોચ સાઈમન કેટિચ પણ મીટિંગમાં હતા. કોચે કહ્યું - ઉલ્લંઘન કરવા પર ખૂબ જ ગંભીરતાથી નિપટવામાં આવશે. ઉલ્લંઘન કરવા પર ખેલાડીઓને હટાવી દેવાશે અને 7 દિવસ માટે ક્વૉરન્ટાઈનમાં મોકલી દેવાશે. ખેલાડીના નેગેટિવ આવવા પર જ તેને પરત ટીમમાં લેવાશે. તેમણે કહ્યું કે, 'જો ખેલાડી જાણી-જોઈને આવું કરશે તો તેને પરિણામો ગંભીર રહેશે. ખેલાડીઓ એક ડોક્યૂમેન્ટ પર સહી કરશે જેમાં પરિણામનો ઉલ્લેખ હશે.'