IPL2020એ તોડ્યા અત્યાર સુધીના તમામ રેકોર્ડ્ઝ, 20 કરોડથી વધુ દર્શકોએ જોઈ પ્રથમ મેચ

નવી દિલ્હી : બહુ બધી અનિશ્ચિતતાઓ બાદ આખરે શનિવાર (19 સપ્ટેમ્બર)થી IPL2020ની શરૂઆત થઈ ગઈ. ટૂર્નામેન્ટની પ્રથમ મેચ બે કટ્ટર હરિફ ટીમો મુંબઈ ઈન્ડિયન્સ અને ચેન્નઈ સુપરકિંગ્સ વચ્ચે રમાઈ. કોરોના મહામારીને કારણે સંક્રમણ ન ફેલાય તેની સાવધાનીના ભાગરૂપે IPLની આ સિઝનની તમામ મેચો દર્શકો વિનાના ખાલી સ્ટેડિયમમાં જ રમાશે પરંતુ દર્શકો ટીવી પર IPLની ભરપૂર મજા માણી રહ્યા છે. 13મી સિઝનની ઉદઘાટન મેચને 20 કરોડથી વધુ લોકોએ ટીવી પર માણી. BCCIના સેક્રેટરી જય શાહે ટ્વીટર દ્વારા આ જાણકારી આપી. આ આંકડાથી સાબિત થાય છે કે, ક્રિકેટ રસિયાઓમાં IPLને લઈને કેટલો ઉત્સાહ છે.

જય શાહે BARC ઈન્ડિયા (બ્રૉડકાસ્ટ ઑડિયન્સ રિસર્ચ કાઉન્સિલ ઈન્ડિયા)ના રેટિંગનો હવાલો આપતા ક્રિકેટ ફેન્સને આ જાણકારી આપી છે. ક્રિકેટની કોઈપણ લીગ કે ટૂર્નામેન્ટની ઉદઘાટન મેચને અત્યાર સુધી આટલી મોટી સંખ્યામાં લોકોમાં જોઈ નથી.


મંગળવારે પોતાના ટ્વીટર એકાઉન્ટ પરથી ટ્વીટ કરતા જય BCCI સચિવ જય શાહે લખ્યું કે, 'ડ્રીમ11 IPLની ઓપનિંગ મેચે નવો રેકોર્ડ બનાવી દીધો છે. BARC અનુસાર મેચ જોવા માટે 20 કરોડથી વધુ લોકોએ ટ્યૂનઈન કર્યું. દેશમાં કોઈપણ સ્પોર્ટ્સ લીગની ઉદઘાટન મેચનો આ સૌથી મોટો આંકડો છે - કોઈપણ લીગને તેની પ્રથમ મેચમાં અત્યાર સુધી આટલી મોટી સંખ્યામાં દર્શકો મળ્યા નથી.'

ઉલ્લેખનીય છે કે, પ્રથમ મેચમાં મહેન્દ્ર સિંહ ધોનીની આગેવાનીવાળી ચેન્નઈ સુપરકિંગ્સની ટક્કર રોહિત શર્માની કેપ્ટનશિપવાળી મુંબઈ ઈન્ડિયન્સ સાથે થઈ હતી. આ મેચમાં ચેન્નઈએ મુંબઈને 5 વિકેટ હરાવી દીધું હતું. શનિવારે શરૂ થયેલી આ લીગમાં અત્યાર સુધી ત્રણ મેચો રમાઈ ચૂકી છે.

જણાવી દઈએ કે, ભારતમાં કોરોના વાયરસના વધતા કેસોને ધ્યાનમાં રાખીને BCCIએ આ વખતની IPL UAEમાં રમાડવાનો નિર્ણય લીધો છે. અહીં ખેલાડીને બાયો બબલ સિક્યોરિટીમાં રાખવામાં આવ્યા છે. સંક્રમણથી બચાવના ઉપાયોને પગલે સ્ટેડિયમમાં દર્શકો ઉપરાંત મીડિયાકર્મીઓને પણ પરવાનગી અપાઈ નથી. દર્શકો વિનાની મેચોને કારણે પહેલા લાગી રહ્યું હતું કે, IPL2020 નિરસ બની શકે છે પરંતુ પ્રથમ મેચનો ડેટા સામે આવ્યા બાદ આખી વાત બદલાઈ ગઈ છે. હવે લીગની આગામી મેચોને પણ આવો જ ધમાકેદાર રિસ્પોન્સ મળશે તેવું માનવામાં આવી રહ્યું છે.