UAEમાં રોહિત શર્માએ ફટકારી ગગનચૂંબી સિક્સ, રોડ પરથી જતી બસ પર પડ્યો બોલ

મુંબઈ ઈન્ડિયન્સની ટીમનો કેપ્ટન રોહિત શર્મા, ઈન્ડિયન પ્રીમિયર લીગ 2020 પહેલા નેટ્સમાં ખૂબ પરસેવો પાડી રહ્યો છે. મુંબઈને પોતાની પહેલી મેચ ચેન્નઈ સુપર કિગ્સ વિરુદ્ધ 19મી સપ્ટેમ્બરે રમવાની છે. આ પહેલા મુંબઈ ઈન્ડિયન્સે બુધવારે એક વિડીયો પોસ્ટ કર્યો છે, જેમાં 'હિટમેન' રોહિત શર્મા મેદાનની બહાર બોલને હિટ કરતા દેખાય છે. રોહિત મારેલી સિક્સથી બોલ સ્ટેડિયમની બહાર રોડ પરથી પસાર થઈ રહેલી બસ પર પડે છે.

મુંબઈ ઈન્ડિયન્સે શેર કરેલા વિડીયોમાં રોહિત શર્મા ક્રિઝમાં આગળ વધીને બોલરના માથા પરથી હવામાં શોટ મારી રહ્યો છે. જોકે હેરાન કરનારી બાબત એ છે કે રોહિત શર્માના બેટથી નીકળેલો શોટ 95 મીટર દૂર સુધી જાય છે. સિક્સ બાદ બોલ સ્ટેડિયમની બહારથી પસાર થઈ રહેલી એક બસ સાથે અથડાય છે.

મુંબઈ ઈન્ડિયન્સે પોતાના ટ્વિટર હેન્ડલ પર વિડીયો સાથે કેપ્શનમાં લખ્યું છે, બેટ્સમેન છગ્ગા મારે છે. લિજેન્ડ સ્ટેડિયમને કૂદાવી દે છે, હિટમેન સિક્સ મારે છે + સ્ટેડિયમને દૂકાવી દે છે + એક ચાલતી બસને મારે છે.

ઉલ્લેખનીય છે કે રોહિત શર્મા IPLના સૌથી સફળ કેપ્ટન્સમાંથી એક છે. તેની આગેવાનીમાં મુંબઈ ઈન્ડિયન્સની ટીમને ચાર વખત IPLનું ટાઈટલ જીતવામાં સફળતા મળી છે. ત્યારે કોરોના વાયરસની વૈશ્વિક મહામારી શરૂ થતા પહેલાથી જ રોહિત શર્મા શાનદાર ફોર્મમાં છે. તે મેચમાં સારા એવા રન કરી રહ્યો હતો. ન્યૂઝિલેન્ડ સામેની ચાર T20માં તેણે 140 રન બનાવ્યા હતા અને સ્ટ્રાઈક રેટ પણ 150થી ઉપર હતી.

નોંધનીય છે કે કોરોના વાયરસના કારણે ક્રિકેટ સહિતની તમામ રમતો પર કેટલાક મહિનાઓ માટે બ્રેક લાગી ગઈ હતી. આ વચ્ચે BCCIએ આ વર્ષે UAEમાં IPLનું આયોજન કર્યું છે. રવિવારે ભારતીય ક્રિકેટ કન્ટ્રોલ બોર્ડ એટલે કે BCCIએ IPLની 13મી સીઝનનું શીડ્યુલ જાહેર કર્યું હતું. જે મુજબ, ટૂર્નામેન્ટની પહેલી મેચ મુંબઈ અને ચેન્નઈની ટીમ વચ્ચે 19મી સપ્ટેમ્બરે રમવાની છે. પાછલી સીઝનમાં પણ આ બંને ટીમો વચ્ચે જ ફાઈનલ મેચ રમાઈ હતી. જોકે બોર્ડે હજુ માત્ર લીગ સ્ટેજ મેચોનું જ શિડ્યુલ જાહેર કર્યું છે. પ્લેઓફનું શિડ્યુલ બાદમાં જાહેર કરવામાં આવશે.