IPL: બુમરાહના તરખાટ-સૂર્યકુમારના ઝંઝાવાતથી મુંબઈએ બેંગલોરને હરાવ્યું

સૂર્યકુમાર યાદવની ધમાકેદાર અડધી સદીની મદદથી મુંબઈ ઈન્ડિયન્સે બુધવારે અબુધાબી ખાતે રમાયેલી મેચમાં રોયલ ચેલેન્જર્સ બેંગલોર સામે પાંચ વિકેટે શાનદાર વિજય નોંધાવ્યો હતો. આ વિજય સાથે મુંબઈ ઈન્ડિયન્સનું આઈપીએલ ટી20 ક્રિકેટ ટુર્નામેન્ટની 13મી સિઝનની પ્લેઓફમાં પહોંચવાનું લગભગ સુનિશ્ચિત થઈ ગયું છે. ઓપનર દેવદત્ત પડિક્કલની અડધી સદીની મદદથી રોયલ ચેલેન્જર્સ બેંગલોરે મુંબઈ સામે 165 રનનો લક્ષ્યાંક મૂક્યો હતો. જેના જવાબમાં મુંબઈએ 19.1 ઓવરમાં પાંચ વિકેટે 166 રન નોંધાવીને મેચ જીતી લીધી હતી. અગાઉ બેંગલોરે નિર્ધારીત 20 ઓવરમાં છ વિકેટે 164 રન નોંધાવ્યા હતા. આ વિજય સાથે મુંબઈએ પોઈન્ટ ટેબલમાં પોતાનું ટોચનું સ્થાન જાળવી રાખ્યું છે. મુંબઈ પાસે 16 પોઈન્ટ છે જ્યારે બેંગલોર 14 પોઈન્ટ સાથે બીજા ક્રમે છે.

165 રનના લક્ષ્યાંકને પાર પાડવા મેદાનમાં ઉતરેલી મુંબઈ ટીમની શરૂઆત ધીમી રહી હતી. 5.3 ઓવરમાં ટીમનો સ્કોર 37 રન હતો. આ સ્કોર પર ટીમે ક્વિન્ટન ડી કોકની વિકેટ ગુમાવી દીધી હતી. ડીકોકે 18 રનનું યોગદાન આપ્યું હતું. જ્યારે તેનો સાથી ઓપનર ઈશાન કિશન 19 બોલમાં ત્રણ ચોગ્ગા અને એક સિક્સર સાથે 25 રન નોંધાવીને આઉટ થયો હતો.

પરંતુ ત્યારબાદ સૂર્યકુમાર યાદવે બેંગલોરના બોલર્સ પર આક્રમણ કરી દીધું હતું. તેણે તોફાની બેટિંગ કરતા અડધી સદી ફટકારી હતી અને ટીમને વિજય અપાવ્યો હતો. સામે છેડે અન્ય કોઈ બેટ્સમેન વધારે સમય ક્રિઝ પર ટકી શક્યો ન હતો પરંતુ સૂર્યકુમારે અંત સુધી એક છેડો જાળવી રાખ્યો હતો. સૂર્યકુમારે 43 બોલમાં અણનમ 79 રનની ઈનિંગ્સ રમી હતી. જેમાં 10 ચોગ્ગા અને ત્રણ શાનદાર સિક્સર સામેલ હતી. આ ઉપરાંત કૃણાલ પંડ્યાએ 10 અને હાર્દિક પંડ્યાએ 17 રનનું યોગદાન આપ્યું હતું. બેંગલોર માટે મોહમ્મદ સિરાજ અને યુઝવેન્દ્ર ચહલે બે-બે તથા ક્રિસ મોરિસે એક વિકેટ ઝડપી હતી.

અગાઉ ઓપનર દેવદત્ત પડિક્કલની શાનદાર અડધી સદીની મદદથી રોયલ ચેલેન્જર્સ બેંગલોરે નિર્ધારીત 20 ઓવરમાં છ વિકેટે 164 રનનો સ્કોર નોંધાવ્યો હતો. બેંગલોરને પ્રથમ બેટિંગનું આમંત્રણ મળ્યું હતું. દેવદત્ત પડિક્કલ અને જોશ ફિલિપની ઓપનિંગ જોડી મેદાનમાં ઉતરી હતી. આ જોડીએ તોફાની બેટિંગ કરતા 7.5 ઓવરમાં જ 71 રનની ભાગીદારી નોંધાવી દીધી હતી. ફિલિપે 24 બોલમાં ચાર ચોગ્ગા અને એક સિક્સર સાથે 33 રનની ઈનિંગ્સ રમી હતી. જોકે, ફિલિપ આઉટ થયા બાદ બેંગલોરનો ધબડકો થયો હતો પરંતુ દેવદત્ત પડિક્કલે એક છેડો જાળવી રાખ્યો હતો.

પડિક્કલે આક્રમક બેટિંગ કરીને રન ગતિ જાળવી રાખી હતી. તેણે 45 બોલમાં 12 ચોગ્ગા અને એક સિક્સરની મદદથી 74 રનની ધમાકેદાર ઈનિંગ્સ રમી હતી. કેપ્ટન વિરાટ કોહલી નવ, એબી ડી વિલિયર્સ 15, શિવમ દૂબે બે તથા ક્રિસ મોરીસ ચાર રન નોંધાવીને આઉટ થયા હતા. જ્યારે ગુરકિરાટ સિંહ માને અણનમ 14 અને વોશિંગ્ટન સુંદરે અણનમ 10 રનનું યોગદાન આપ્યું હતું. મુંબઈ માટે જસપ્રિત બુમરાહે ત્રણ તથા ટ્રેન્ટ બોલ્ટ, રાહુલ ચાહર અને કેઈરોન પોલાર્ડે એક-એક વિકેટ ઝડપી હતી.