IPL2020: વિરાટ કોહલીના ધરખમ ફોર્મનું રોહિતની મુંબઈ ઈન્ડિયન્સ સાથે ખાસ કનેક્શન

દુબઈ: રૉયલ ચેલેન્જર્સ બેંગ્લોર (RCB)ના કેપ્ટન વિરાટ કોહલીએ કહ્યું કે, IPL13માં મુંબઈ ઈન્ડિયન્સ વિરુદ્ધ સુપર ઓવરમાં રમેલી ઈનિંગથી તેને પોતાનું ફોર્મ પરત મેળવવામાં મદદ મળી છે. કોહલીએ 28 સપ્ટેમ્બરના રોજ મુંબઈ ઈન્ડિયન્સ વિરુદ્ધ સુપર ઓવરમાં બેટિંગ કરી હતી જ્યાં તેણે પોતાની ટીમને જીત અપાવી હતી. કોહલીએ આના પછી શનિવારે ચેન્નઈ સુપરકિંગ્સ વિરુદ્ધ 90 રનની અણનમ ઈનિંગ રમી. તેની આ ઈનિંગના દમ પર RCBએ જીત મેળવી. કોહલીને શાનદાર બેટિંગ માટે મેન ઑફ મેચ પસંદ કરાયો હતો.

તેની ઈનિંગના દમ પર જ બેંગ્લોરે CSKને 170 રનનો ટાર્ગેટ આપ્યો હતો અને 37 રનથી જીત નોંધાવી હતી. કોહલીએ ચેન્નઈ વિરુદ્ધ મેચ પહેલાની બે મેચોમાં 43 અને અણનમ 72 રનની ઈનિંગ્સ રમી હતી. આના પહેલા તે 14, 1 અને 3 રન જ બનાવી શક્યો હતો. કોહલીએ ચેન્નઈની મેચ બાદ કહ્યું કે, 'આના પહેલ હું ઘણું બધું કરવાનું વિચારી રહ્યો હતો. જો તમે જવાબદારીઓ વિશે વિચારશો તો આનાથી તમારા ઉપર પ્રેશર વધી જશે અને એક પ્લેયર તરીકે રમી નહીં શકો. ટીમની સફળતા માટે તમારા કૌશલ્યનું હોવું જરૂરી છે.'

તેણે કહ્યું કે, 'તે સુપર ઓવર જ્યાં મારે રન બનાવવાના હતા અને હું ત્યાં આઉટ થઈ ગયો અને અમે મેચ હારી ગયા હતા. ત્યારબાદ મેં ટ્રેનિંગનો આનંદ લેવાનું શરૂ કર્યું અને પછી બેટિંગના હિસાબથી આગામી કેટલાક સેશન ઘણા સારા હતા. મેં ગત મેચમાં પણ બોલને સારી રીતે હિટ કરી રહ્યો હતો અને આજે પણ એવું જ ઈચ્છતો હતો. આ તમામ દિવસોમાં ટ્રેનિંગથી પણ સારી મદદ મળી છે.'

કોહલીએ CSK સામેની મેચમાં 39 બોલમાં પોતાની અર્ધસદી પૂરી કરી અને પછીના ફક્ત 13 બોલમાં 37 રન ફટકારી દીધા. કેપ્ટને કહ્યું કે, 'દરેક બોલને ફટકારવાને બદલે હું પરિસ્થિતિઓને સમજવાનો પ્રયત્ન કરી રહ્યો હતો. આ જ અનુભવ છે અને ઘણું ક્રિકેટ રમવાથી, ખાસ કરીને ટી20 ક્રિકેટ રમવાથી હું એટલું તો સમજી ગયો છું કે, જો તમે સેટ થઈ ગયા છો તો અંતિમ ઓવરોમાં હિટ કરી શકો છો.'