IPL: અમ્પાયરની ભૂલથી પંજાબ જીતેલી મેચ હાર્યું, સેહવાગે કહ્યું- તેમને જ બનાવો મેન ઓફ ધ મેચ

રવિવારે આઈપીએલના એક રોમાચંક મુકાબલામાં દિલ્હી કેપિટલ્સને કિંગ્સ ઈલેવન પંજાબ સામે જીત મળી ગઈ. નિર્ધારિત 20-20 ઓવરમાં મેચ ટાઈ રહી. આ બાદ મેચનો નિર્ણય સુપર ઓવર દ્વારા કરાયો. જ્યાં દિલ્હીની ટીમે બાજી મારી લીધી. પરંતુ દિલ્હીની જીત પર ઘણા પ્રકારના સવાલો ઉઠી રહ્યા છે. ક્રિકેટના ઘણા પૂર્વ દિગ્ગજ અને ફેન્સ આરોપ લગાવી રહ્યા છે કે અમ્પાયરની ભૂલના કારણે પંજાબની ટીમ મેચ હારી ગઈ. હકીકતમાં અમ્પાયરે પંજાબનો એક રન શોર્ટ બતાવ્યો હતો. પરંતુ સ્લો મોશન રિપ્લેમાં સ્પષ્ટ જોઈ શકાતું હતું કે આ રન શોર્ટ નહોતો.

અમ્પાયરથી ક્યાં અને કેવી રીતે ભૂલ થઈ?
પંજાબ સામે જીતવા માટે 157 રનનો ટાર્ગેટ હતો. અંતિમ 10 બોલમાં પંજાબને જીતવા માટે 21 રન બનાવવાના હતા. જે અંદાજમાં મયંક અગ્રવાલ બેટિંગ કરી રહ્યો હતો, પંજાબની જીત નિશ્ચિત લાગી રહી હતી. 19મી ઓવરમાં બોલિંગ માટે આવેલા કગિસો રબાડાની ઓવરમાં અગ્રવાલે ચોગ્ગો માર્યો. આ બાદ રબાડાએ યોર્કર બોલ ફેંક્યો જેમાં મયંક બેરન લીધા. બીજા છેડે ક્રિસ જોર્ડન બેટિંગ કરી રહ્યો હતો. પરંતુ અમ્પાયર નિતિન મેનને તેને શોર્ટ રન બતાવી દીધો. આમ પંજાબને 2ની જગ્યાએ માત્ર 1 રન આપવામા આવ્યો. ટીવીના સ્લો મોશનમાં સ્પષ્ટ જોઈ શકાતું હતું કે જોર્ડનનો આ રન શોર્ટ નહોતો. તેણે બેટ યોગ્ય રીતે મૂક્યું હતું. અંતમાં મેચ 1 રનથી ટાઈ થઈ ગઈ.



સેહવાગ થયો ગુસ્સે
અમ્પાયરની આ ભૂલ પર વિરેન્દ્ર સેહવાગ ભડકી ગયો. સેહવાગ પંજાબનો કોચ રહી ચૂક્યો છે. તેણે અમ્પાયરના નિર્ણય પર ટોણો મારતા કહ્યું, 'હું મેન ઓફ ધ મેચના નિર્ણયથી ખુશ નથી. મેન ઓફ ધ મેચના સાચા દાવેદાર અમ્પાયર છે. તે શોર્ટ રન નહોતો. આ અંતરથી પંજાબની ટીમ હારી ગઈ.'

મેચનું બદલાયું પરિણામ
પહેલા બેટિંગ કરતા દિલ્હી કેપિટલ્સે 157 રન બનાવ્યા. જવાબમાં પંજાબની ટીમે 157 રન જ બનાવ્યા. મેચ સુપર ઓવરમાં ગઈ. જ્યાં કાગિસો રબાડાએ માત્ર 3 બોલમાં જ પંજાબની ઈનિંગ્સ ખતમ કરી દીધી. પંજાબે સુપર ઓવરમાં જીત માટે દિલ્હીને માત્ર 3 રનનો ટાર્ગેટ આપ્યો, જેને તેણે 2 બોલમાં જ મેળવી લીધો. આમ દિલ્હીની જીત થઈ.