IPL: આજે બેંગલોર સામેના મુકાબલામાં કોલકાતાની નજર પ્લેઓફ પર

આઈપીએલ ટી20 ક્રિકેટ ટુર્નામેન્ટની 13મી સિઝન હવે રોમાંચક તબક્કમાં પહોંચી છે અને તેવામાં પ્લે ઓફ પર નજર રાખીને કોલકાતા નાઈટ રાઈડર્સ અને રોયલ ચેલેન્જર્સ બેંગલોર આજે આમને સામને થશે. ટુર્નામેન્ટમાં વર્તમાન પોઈન્ટ ટેબલ જોવામાં આવે તો ચાર ટીમોએ પોતાની દાવેદારી નોંધાવી દીધી છે. જોકે, તેમાંથી એક પણ ટીમ હળવાશથી રમી શકે તેમ નથી કેમ કે પ્રતિ મેચ ચિત્ર બદલાતું જાય છે. કોલકાતા હાલમાં ચોથા ક્રમે છે જ્યારે બેંગલોર ત્રીજા સ્થાને છે. જ્યારે બંને ટીમો આજે અબુધાબીમાં ટકરાશે ત્યારે તેમાંથી વિજેતા ટીમ પ્લે ઓફ તરફ આગેકૂચ કરશે. મેચનું પ્રસારણ રાત્રે 7.30 કલાકથી થશે.

વર્તમાન ફોર્મ જોતા વિરાટ કોહલીની બેંગલોર ટીમનું પલડું ભારે છે. જોકે, પોતાની અંતિમ મેચમાં સનરાઈઝર્સ હૈદરાબાદ સામે સુપર ઓવરમાં વિજય નોંધાવ્યા બાદ કોલકાતાનો આત્મવિશ્વાસ પણ વધ્યો છે. ગત સપ્તાહે આ બંને ટીમો આમને સામને થઈ હતી ત્યારે બેંગલોરનો વિજય થયો હતો. તેથી કેપ્ટન ઈયોન મોર્ગન આ મેચ જીતીને હિસાબ બરાબર કરવા આતુર હશે.

બેંગલોરના બેટ્સમેનોએ લય મેળવી લીધી છે. એરોન ફિંચ અને દેવદત્ત પડિક્કલની ઓપનિંગ જોડી ટીમને મજબૂત શરૂઆત અપાવે છે. જ્યારે કેપ્ટન વિરાટ કોહલીએ પણ ફોર્મ મેળવી લીધું છે. જોકે, ટીમની સૌથી મોટી તાકાત એબી ડી વિલિયર્સ છે જે એકલા હાથે મેચ જીતાડી રહ્યો છે. ગત સપ્તાહે કોલકાતા સામે ડી વિલિયર્સે 33 બોલમાં 73 રન ફટકાર્યા હતા અને તેમના હાથમાંથી મેચ આંચકી લીધી હતી. તેથી આ વખતે કોલકાતાના બોલર્સે વધારે સારી રણનીતિ સાથે ડી વિલિયર્સનો સામનો કરવો પડશે.

કોલકાતાની બેટિંગ નિરાશાજનક રહી છે. શુભમન ગિલ અને રાહુલ ત્રિપાઠીની જોડીનું પ્રદર્શન સાતત્યપૂર્ણ રહ્યું નથી. ઈયોન મોર્ગન આક્રમક બેટ્સમેન છે પરંતુ તે પોતાની પ્રતિષ્ઠા પ્રમાણે દેખાવ કરી શક્યો નથી. જ્યારે પોતાના પ્રદર્શન પર ધ્યાન આપવા માટે દિનેશ કાર્તિકે કેપ્ટનશિપ છોડી દીધી છે. કાર્તિક અનુભવી ખેલાડી છે અને તેણે જવાબદારીપૂર્વક રમવું પડશે.