KL રાહુલે તોડ્યો દ્રવિડનો ખાસ રેકોર્ડ, ઈંગ્લેન્ડમાં કોઈ નથી કરી શક્યું આવી કમાલ

I am Gujarat

બેટિંગમાં ફેઈલ પણ ફિલ્ડિંગમાં રાહુલની કમાલ

ભારતીય ઓપનર લોકેશ રાહુલ ભલે ઈંગ્લેન્ડ સામેની વર્તમાન ટેસ્ટ સીરીઝમાં કંઈ ખાસ ન કરી શક્યો હોય પણ તેણે આ સીરીઝમાં કંઈક એવી કમાલ કરી છે જેના વડે તેણે ભારતના પૂર્વ કેપ્ટન રાહુલ દ્રવિડનો એક ખાસ રેકોર્ડ તોડી નાખ્યો છે.

દ્રવિડનો આ રેકોર્ડ તોડ્યો

અસલમાં રાહુલે બેટિંગમાં નહીં પણ કેચ પકડવા બાબતે દ્રવિડનો રેકોર્ડ તોડ્યો છે. લોકેશ હવે એક ટેસ્ટ સીરીઝમાં સૌથી વધુ કેચ પકડનારો ખેલાડી બની ગયો છે. તેણે પ્રથમ ઈનિંગ સ્ટુઅર્ટ બ્રોડનો કેચ પકડવાની સાથે રાહુલ દ્રવિડના રેડોર્ડની બરાબરી કરી જેણે 2004માં ઓસ્ટ્રેલિયા પ્રવાસ પર બોર્ડર-ગાવસ્કર સીરીઝમાં 13 કેચ ઝડપ્યા હતા.

ઈંગ્લેન્ડમાં કોઈ નથી કરી શક્યું આ કારનામું

લોકેશ રાહુલે ઈંગ્લેન્ડની ધરતી એક નવો રેકોર્ડ બનાવ્યો છે. રાહુલ હવે ઈંગ્લેન્ડમાં ટેસ્ટ સીરીઝમાં સૌથી વધુ કેચ પકડનારો ખેલાડી બની ગયો છે. તેણે બેન સ્ટૉક્સનો કેચ પકડી આ સીરીઝમાં પોતાના કેચની સંખ્યા 14 કરી લીધી, જે અગાઉ કોઈ ખેલાડી કરી શક્યો નથી.

વર્લ્ડ રેકોર્ડથી એક કેચ માટે ચૂકી ગયો

જોકે, રાહુલ ઓસ્ટ્રેલિયાના જેક ગ્રેગરીનો રેકોર્ડ પાર ન કરી શક્યો, જેણે 1920-21ની એશિઝ સીરીઝમાં 15 કેચ પકડ્યા હતા.જો તેણે રવિવારે મોઈન અલીનો કેચ ન છોડ્યો હોત તો તે 97 વર્ષ જૂના રેકોર્ડની બરાબરી કરી શક્યો હોત. જેક ગ્રેગરીના રેકોર્ડની નજીક કેટલાક ખેલાડીઓ પહોંચ્યા પણ તેની બરાબરી કે પાર જઈ શક્યા નહીં. આ યાદીમાં ઓસ્ટ્રેલિયાના જ ગ્રેગ ચેપલ શામેલ છે જેમણે 1974-75ની એશિઝમાં 14 કેચ પકડ્યા હતા.

આ રેકોર્ડ પણ બનાવ્યો

તમને જણાવી દઈએ કે, ઓવલ ટેસ્ટની બીજી ઈનિંગમાં રાહુલ હાફ સેન્ચુરી બનાવી ચૂક્યો છે. તે રહાણે સાથે મળીને ટીમને હારથી બચાવવા સંઘર્ષ કરી રહ્યો છે. તેણે હાફ સેન્ચુરી ફટકારવાની સાથે વધુ એક રેકોર્ડ પણ પોતાના નામે કર્યો છે. વર્તમાન સીરીઝમાં ભારતીય ઓપનર તરફથી આ પ્રથમ હાફ સેન્ચુરી છે.