IPL : રાશિદ ખાન બંધ કરાવી દે છે અફઘાનિસ્તાનના બજાર, જુઓ વીડિયો

I am Gujarat

IPLમાં રાશિદનું જબરદસ્ત પરફોર્મન્સ

IPLની આખી સિઝનમાં જે ખેલાડીએ ફેન્સને સૌથી વધુ એન્ટરટેઈન કર્યા તે છે અફઘાનિસ્તાની સ્પિનર રાશિદ ખાન. રાશિદે બોલિંગ વડે તો વિરોધીઓના નાકમાં દમ કરી જ દીધો હતો પણ કોલકાતા નાઈટ રાઈડર્સ સામેની ખૂબ જ મહત્વની મેચમાં તેણે 10 બોલમાં 34 રનની વિસ્ફોટક ઈનિંગ રમી ટીમની જીતમાં મુખ્ય ભૂમિકા ભજવી.

અફઘાનિસ્તાનને મળ્યો તેમનો હિરો

અવારનવાર બોમ્બ ધડાકા અને હિંસક પ્રદર્શનોને કારણે ભય વચ્ચે જીવન જીવતા અફઘાનિસ્તાનના યુવાનોને નવો હિરો મળી ગયો છે. અત્યારે અફઘાનિસ્તાન દરેક ઘરમાં લેગ સ્પિનર રાશિદ ખાનની ચર્ચા થઈ રહી છે. IPL શરૂ થતા પહેલા પણ તેની ચર્ચા તો થતી જ હતી પણ જેમ-જેમ મેચો રમાતી ગઈ, રાશિદની રમત વધુને વધુ નિખરતી ગઈ અને લોકોનું અટેન્શન મેળવતી ગઈ.

રાશિદને જોવા શટર પાડી દે છે વેપારીઓ

જ્યારે-જ્યારે સનરાઈઝર્સની મેચ રમાય છે ત્યારે હજારો અફઘાનીસ્તાની ફેન્સ સમય પહેલા પોતપોતાના ઘરમાં ટીવી સામે ગોઠવાઈ જાય છે અને રાશિદ ખાનની બોલિંગ જોવા આતુર બની જાય છે. શનિવારે કોલકાતા સામેની મેચ બાદ તો ઘણી જગ્યાએ લોકોએ ફાયરિંગ કરીને ઉજવણી કરી. છેલ્લી કેટલીક મેચોની જેમ શનિવારે પણ કાબુલમાં ઘણા વ્યાપારીઓએ મેચ પૂરી થાય ત્યાં સુધી દુકાનો બંધ રાખી. ઘણા લોકોએ પોતાની દુકાનના શટર પાડી દીધા. આ લોકોની ખુશી સાતમા આસમાને ત્યારે પહોંચી ગઈ જ્યારે રાશિદ ખાનને મેન ઑફ ધ મેચનો એવોર્ડ મળ્યો.

દેશનું ગૌરવ વધારી રહ્યો છે રાશિદ

રાશિદ ખાનના પ્રદર્શન વિશે કાબુલના એક વેપારી કહે છે કે, ભારતમાં ક્રિકેટ ખૂબ સારા સ્તરે છે પણ IPLની હરાજીમાં અમારા દેશના ખેલાડીઓ વેચાયા તે અમારા માટે ખૂબ ગર્વની બાબત છે. અન્ય એક વેપારી કહે છે કે, હું જ્યારે પણ રાશિદને IPLમાં રમતા જોઉં છું ત્યારે મારી છાતી ગર્વથી ફૂલી જાય છે.

જુઓ કાબુલના માર્કેટનો વીડિયો