'IPLની હરાજી પર ફોકસ નહી, રોહિત-કોહલીને પછાડવા મારું ટાર્ગેટ'

વિશાખાપટ્ટનમ: વેસ્ટ ઈન્ડીઝના ઓપનિંગ બેટ્સમેન શાઈ હોપને વિશ્વાસ છે કે, ભારત વિરુદ્ધ બુધવારે બીજી વન-ડે દરમિયાન તેના કેટલાક સાથી ખેલાડીઓની નજર IPLની હરાજી પર છે પણ તેનો ટાર્ગેટ બીજો જ કંઈક છે. હોપે મંગળવારે કહ્યું કે, તેનો ટાર્ગેટ 2019માં સૌથી વધુ રન બનાવનારા બેટ્સમેનોની યાદીમાં વિરાટ કોહલી અને રોહિત શર્માને પછાડવાનો છે. હોપને IPLની હરાજી પર પણ સવાલ કરાયા તેના જવાબમાં તેણે આ જવાબ આપ્યો. IPL 2020 માટે ખેલાડીઓની હરાજી ગુરુવારે થશે. સીરિઝની પ્રથમ વન-ડેમાં સદી ફટકારનારા હોપે કહ્યું કે, ‘મને વિશ્વાસ છે કે, કેટલાક ખેલાડીઓ નું ધ્યાન IPLની હરાજી પર હશે પણ મારા માટે તે ગૌણ છે. અમે અહીં ભારત વિરુદ્ધ સીરિઝ રમવા આવ્યા છીએ અને તે જ પ્રાથમિકતા છે.’ હોપ આ વર્ષે વન-ડે ક્રિકેટમાં સૌથી વધુ રન બનાવનારા બેટ્સમેનોની યાદીમાં વિરાટ કોહલી (1292) અને રોહિત શર્મા (1268) બાદ ત્રીજા સ્થાને છે. તેના નામે 1225 રન છે. તેણે કહ્યું કે, ‘એક બેટ્સમેન તરીકે તમે વધુમાં વધુ યોગદાન આપવા માગો છે અને જો આનાથી ટીમ જીતે છે તો વધુ સંતોષ થાય છે. આશા છે કે, અમે તેમના ટૉપ ઓર્ડરની વિકેટો જલ્દી લઈશું અને પોતે મોટો સ્કોર બનાવી શકીશું.’ ચેન્નઈમાં પ્રથમ મેચ દરમિયાન હોપનું ધ્યાન એકવાર પણ કોઈ IPL ફ્રેન્ચાઈઝીને પ્રભાવિત કરવા પર નહોતું. તેણે કહ્યું, ‘હું ટીમની જરૂરિયાત અનુસાર રમી રહ્યો હતો. અમારે 280 રનનો ટાર્ગેટ ચેઝ કરવાનો હતો અને આ સામૂહિત પ્રયત્નથી જ શક્ય હતું. મારું કામ ટકીને રમવાનું હતું.’ શિમરોન હેટમાયર જેવા આક્રમક બેટ્સમેનની સામે કોઈપણ નિસ્તેજ થઈ જાય છે. હોપને ખબર હતી કે, બંનેએ વિપરિત અંદાજમાં રમવું પડશે. તેણે કહ્યું કે, ‘બીજા છેડા પર કોઈને આટલી સહજતાથી રમતા જોઈને અસહજ થવું સ્વાભાવિક છે. હું પોતાને યાદ અપાવતો રહેતો હતો કે, વિરોધી બોલર્સને હાવી થવા દેવાના નથી. એક છેડા પર કોઈ આક્રમક રમી રહ્યું છે તો બીજો છેડો સાચવી રાખવાનો છે.’