IPL : ધોની શ્રેષ્ઠ, કોહલી સૌથી ખરાબ કેપ્ટન! જુઓ આ આંકડા

I am Gujarat

IPLનો સૌથી નબળો કેપ્ટન છે વિરાટ

ભારતીય ક્રિકેટ ટીમના કેપ્ટન વિરાટ કોહલીનું નામ દુનિયાના સૌથી શાનદાર બેટ્સમેનોમાં શામેલ છે. કેપ્ટન તરીકે પણ કોહલીનો રેકોર્ડ શાનદાર છે પણ વાત જ્યારે IPLની આવે છે ત્યારે તસવીર સંપૂર્ણપણે બદલાઈ જાય છે. કોહલી છેલ્લી ઘણી સીઝન્સથી RCBની કેપ્ટનશિપ કરી રહ્યો છે પણ અત્યાર સુધી પોતાની ટીમને IPLમાં ચેમ્પિયન બનાવી શક્યો નથી. વર્તમાન સીઝનમાં પણ RCBનું પ્રદર્શન અપેક્ષાથી ઘણું ઉતરતું રહ્યું છે. આંકડાની રીતે જોવા જઈએ તો કોહલી IPLનો સૌથી ખરાબ કેપ્ટન સાબિત થયો છે.

જીતની ટકાવારી સૌથી ઓછી

કોહલીની કેપ્ટનશિપમાં બેંગ્લોરની જીતની ટકાવારી માત્ર 46.59 ટકા રહી છે જે તમામ IPL કેપ્ટન્સથી ઓછી છે. કોહલીની કેપ્ટનશિપમાં RCBએ અત્યાર સુધી 88 મેચો રમી છે, જેમાંથી માત્ર 41 મેચોમાં તેને જીત મળી જ્યારે 44 મેચોમાં તેને હારનો સામનો કરવો પડ્યો છે.

ધોની IPLમાં પણ સુપરહિટ

બીજી તરફ પોતાની કેપ્ટનશિપમાં ભારતીય ટીમને નવી ઊંચાઈએ લઈ જનારા મહેન્દ્રસિંહ ધોનીનો કેપ્ટન તરીકે IPL રેકોર્ડ શાનદાર રહ્યો છે. ચેન્નઈ સુપરકિંગ્સની કેપ્ટનશિપ કરનારા ધોનીની જીતની ટકાવારી 59.06 રહી છે, જે કોઈપણ અન્ય કેપ્ટન કરતા વધારે છે. તેણે ચેન્નઈને બે વાર ચેમ્પિયન બનાવી છે. ધોની બાદ મુંબઈ ઈન્ડિયન્સની કેપ્ટનશિપ કરનારા સચિન તેંડુલકરનું નામ આવે છે, જેની જીતની ટકાવારી 58.82 રહી છે અને ત્યારબાદ મુંબઈ ઈન્ડિયન્સના જ વર્તમાન કેપ્ટન રોહિત શર્મા છે જેણે પોતાની આગેવાનીમાં ટીમને 58.02 ટકા મેચોમાં જીત અપાવી છે. રોહિત ત્રણ વાર પોતાની ટીમને ચેમ્પિયન બનાવી ચૂક્યો છે.

શેન વોર્ન, ગંભીરનો ટ્રેક રેકોર્ડ પણ શાનદાર

આ લિસ્ટમાં IPLની પ્રથમ બે સીઝનમાં રાજસ્થાન રૉયલ્સની કેપ્ટનશિપ કરનારા શેન વોર્નનું નામ ચોથા સ્થાને છે, જેણે 56.36 ટકા મેચોમાં ટીમને જીત અપાવી છે. આ સીઝનમાં દિલ્હી ડેરડેવિલ્સની કમાન સંભાળનારા અને ગૌતમ ગંભીરે ટીમના અને પોતાના ખરાબ પ્રદર્શનને લીધે કેપ્ટન પદ છોડી દીધું છે. જોકે, અગાઉ તેણે કોલકાતા નાઈટ રાઈડર્સના કેપ્ટન તરીકેની જવાબદારી ખૂબ સારી રીતે નિભાવી અને 2 વાર ટીમને IPLની ચેમ્પિયન બનાવી. તેની જીતની ટકાવારી 55.04 ટકા રહી છે. ત્યારબાદ વીરેન્દ્ર સેહવાગ અને એડમ ગિલક્રિસ્ટ આવે છે અને છેલ્લું નામ વિરાટ કોહલીનું છે.

કાગનો વાઘ સાબિત થઈ છે RCB

ઉલ્લેખનીય છે કે, મોટાભાગની સીઝન્સમાં RCBની ટીમ પેપર પર ખૂબ જ મજબૂત દેખાઈ છે પણ એકેય સીઝનમાં પોતાની ક્ષમતા અનુસાર પ્રદર્શન કરી શકી નથી. દરેક વખતે ટીમ પાસે દિગ્ગજ પ્લેયર્સ હોવા છતા તેનું પ્રદર્શન ફિક્કુ જ રહ્યું છે.