આ શું...? આઉટ થયા વિના જ પેવેલિયન જતો રહ્યો કોહલી!

માન્ચેસ્ટર: વર્લ્ડ કપમાં રવિવારે ભારતે કટ્ટર વિરોધી પાકિસ્તાન સામેની મેચમાં રનોનો અંબાર લગાવી દીધો. ઈન્ડિયાએ માન્ચેસ્ટરના ઑલ્ડ ટ્રેફર્ડ મેદાન પર 5 વિકેટે 336 રન બનાવી દીધા. ભારત તરફથી ઓપનર રોહિત શર્માએ આક્રમક 140 રન ફટકાર્યા. તેના ઉપરાંત કેપ્ટન વિરાટ કોહલીએ પણ શાનદાર 77 રન બનાવ્યા. વર્લ્ડ કપમાં આ ભારતનો પાકિસ્તાન વિરુદ્ધ અત્યાર સુધીનો સૌથી મોટો સ્કોર છે. આ મેચમાં એક એવી ઘટના બની જેને બધાને ચોંકાવી દીધા. મેચની 48મી ઓવરના ચોથા બોલ પર કંઈક એવું બન્યું કે, જેણે ભારતીય ક્રિકેટ ફેન્સને થોડીવાર માટે વિચારતા કરી મૂક્યા. કેપ્ટન વિરાટ કોહલી આઉટ થયા વિના જ પેવેલિયન પરત ફરી ગયો. અસલમાં મોહમ્મદ આમિરની બોલિંગમાં કોહલીએ હુક શૉટ મારવાનો પ્રયત્ન કર્યો, બોલ વિકેટકીપર પાસે ગયો અને ફિલ્ડીંગ ટીમે અપીલ કરી. જોકે, એમ્પાયર કોઈ નિર્ણય આપે તે પહેલા જ કોહલીએ ચાલતી પકડી લીધી. આ જોઈ બધા દંગ રહી ગયા. બાદમાં જ્યારે રિપ્લેમાં જોવામાં આવ્યું તો સ્પષ્ટ દેખાતું હતું કે, કોહલી નોટઆઉટ હતો. અસલમાં એમ્પાયર આઉટ-નોટઆઉટનો નિર્ણય આપે તે પહેલા જ કોહલીએ પેવેલિયન તરફ ચાલવાનું શરૂ કરી દીધું. એમ્પાયરને જોતા લાગતું હતું કે, તે આ વાત અંગે ચોક્કસ નહોતા કે, બોલ કોહલીના બેટને અડ્યો છે પણ વિરાટે જ સમર્પણ કરી દેતા ભારતની પાંચમી વિકેટ પડી ગઈ હતી. જો કોહલી ક્રિઝ પર ઊભો રહ્યો હોત અને કદાચ એમ્પાયરે તેને આઉટ પણ જાહેર કરી દીધો હોત તો તેની પાસે રિવ્યૂ લેવાનો વિકલ્પ હતો જેમાં તે નોટઆઉટ જાહેર થાત તે નક્કી જ હતું.