ઓલિમ્પિક પહેલા કોરોનાને હરાવનારી લવલીનાએ જીત્યો મેડલ, જાણો તેની આ ખાસ વાતો

ઘણા ઓછા લોકોને ખ્યાલ છે કે ઓલિમ્પિક માટે રવાના થવા થોડા મહિના પહેલા લવલીનાને કોરોનાનો ચેપ લાગ્યો હતો. જોકે, આ બીમારી પણ તેનું મનોબળ તોડી શકી ન હતી. કોવિડ-19ને હરાવ્યા બાદ લવલીનાએ ફરીથી ટ્રેનિંગની શરૂઆત કરી હતી. લવલીનાને કોરોના થયો હોવાનો ખુલાસો તેના મેન્ટર પરારથાનાએ કર્યો હતો.

લવલીના ઓલિમ્પિકમાં ક્વોલિફાઈ કરનારી આસામની પ્રથમ મહિલા બોક્સર અને ફક્ત બીજી બોક્સર છે. તેના પહેલા શિવા થાપાએ ઓલિમ્પિકમાં આસામનું પ્રતિનિધિત્વ કર્યું હતું. જ્યારે લવલીના અર્જુન એવોર્ડ જીતનારી આસામની છઠ્ઠી મહિલા ખેલાડી છે.

લવલીનાના પિતા એક નાના વેપારી છે અને તેમને પોતાની ત્રણ પુત્રીઓના ઉછેર માટે ઘણો સંઘર્ષ કરવો પડ્યો હતો. લવલીનાની બે મોટી બહેનો રાષ્ટ્રીય સ્તરે કિક બોક્સિંગ રમી ચૂકી છે. લવલીના પણ કિક બોક્સિંગ રમી ચૂકી છે. તેણે પોતાની કારકિર્દીનો પ્રારંભ જ આ રમતથી કર્યો હતો. જોકે, વધારે તક ન મળવાના કારણે તેણે પોતાનો માર્ગ બદલી દીધો હતો. સ્પોર્ટ્સ ઓથોરિટી ઓફ ઈન્ડિયાએ તેની હાઈસ્કૂલમાં ટ્રાયલ યોજી હતી અને ત્યાં તેની પ્રતિભાને ઓળખી કાઢવામાં આવી હતી. ત્યારબાદ લવલીનાએ જાણીતા કોચ પદુમ બોરોની દેખરેખમાં 2012માં ટ્રેનિંગ લેવાનું શરૂ કર્યું હતું. ત્યારબાદ શિવ સિંહે તેને ટ્રેનિંગ આપી હતી.

સતત મહેનતથી તેની રમત સુધરતી ગઈ હતી અને તેની કારકિર્દીમાં સૌથી મોટી તક 2018માં આવી હતી અને તેને કોમનવેલ્થ ગેમ્સમાં ભાગ લેવાની તક મળી હતી. જોકે, વિવાદ ત્યારે ઊભો થયો જ્યારે સમાચાર આવ્યા કે તેને તે પસંદ થઈ છે તેની સૂચના પણ મળી ન હતી. તેને આ વાતની જાણ મીડિયા દ્વારા થઈ હતી. આ ગેમ્સમાં તે બ્રિટનની સેન્ડી રિયાન સામે ક્વાર્ટર ફાઈનલમાં હારી ગઈ હતી જેણે બાદમાં ગોલ્ડ મેડલ જીત્યો હતો. જોકે, આ ગેમ્સ દ્વારા તેનો આત્મવિશ્વાસ વધ્યો હતો.

2 ઓક્ટોબર 1997માં જન્મેલી લવલીનાની મહેનત રંગ લાવી અને મેડલ જીતવાની શરૂઆત કરી. ઘણી રાષ્ટ્રીય સ્પર્ધાઓમાં મેડલ જીત્યા બાદ તેણે 2018માં વિમેન્સ વર્લ્ડ ચેમ્પિયનશિપમાં તેણે બ્રોન્ઝ મેડલ જીત્યો હતો જ્યારે 2019 પણ તેણે આ જ સ્પર્ધામાં બ્રોન્ઝ મેડલ જીત્યો હતો. હવે તેણે ઓલિમ્પિક્સમાં પણ મેડલ સુનિશ્ચિત કર્યો છે. જોકે, દેશવાસીઓને આશા રાખી રહ્યા છે કે તે આ વખતે ગોલ્ડ મેડલ જીતે.