કેન્યાના કિપચોગેએ ઈતિહાસ રચ્યો, બે કલાકની અંદર મેરેથોન પૂરી કરનારો પ્રથમ એથ્લેટ બન્યો

વિએનાઃ કેન્યાના એલિયુડ કિપચોગેએ શનિવારે એથ્લેટિક્સમાં એક નવો ઈતિહાસ રચી દીધો છે. કિપચોગે બે કલાકની અંદર મેરેથોન પૂરી કરનારો વિશ્વનો પ્રથમ વ્યક્તિ બની ગયો છે. જોકે, તેની આ ઐતિહાસિક સિદ્ધિને સ્પોર્ટ્સ ગવર્નિંગ બોડી દ્વારા માન્યતા મળશે નહીં. ઓલિમ્પિક મેરેથોન ચેમ્પિયન અને વર્લ્ડ રેકોર્ડ ધરાવતા દોડવીરે વિએનાના પ્રાટર પાર્ક ખાતે યોજાયેલી મેરેથોન એક કલાક અને 59:40 મિનિટમાં પૂરી કરી હતી. સાત સભ્યોની ટીમ પેસસેટર્સ ટીમ તેની સાથે રહી હતી અને તેમાં કેટલાક જાણીતા એથ્લેટ્સ પણ સામેલ હતા. તેમણે સમયની ગણતરી કરી હતી તે પ્રમાણે કિપચોગેએ 2.50 મિનિટમાં એક કિલોમીટરનું અંતર કાપ્યું હતું. તેણે મેરેથોનનું અડધુ અંતર કાપવા માટે 59.35 મિનિટનો સમય લાગ્યો હતો. તેણે પ્રત્યેક કિલોમીટરનું અંતર કાપવા માટ 2.48થી 2.52 મિનિટનો સમય લીધો હતો. અંતિમ કિલોમીટરમાં પેસમેકર્સ અને કાર કિપચોગેથી દૂર થઈ ગયા હતા અને તેણે હસતા હસતા પ્રેક્ષકોનું અભિવાદન સ્વીકારતા રેસ પૂરી કરી હતી. જોકે, આઈએએએફએ કહ્યું છે કે તેઓ આ રેકોર્ડને માન્યતા આપશે નહીં કેમ કે આ મેરેથોન ઓપન સ્પર્ધા ન હતી. જોકે, એથ્લેટિક્સનું વૈશ્વિક સંચાલન કરતી સંસ્થાના પ્રમુખ સેબાસ્ટિયન કોએ કિપચોગેના પ્રયાસને આવકાર્યો છે. આ મેરેથોન બ્રિટિશ કેમિકલ કંપની આઈએનઈઓએસ દ્વારા આયોજીત હતી. નોંધનીય છે કે બે વર્ષ અગાઉ મોન્ઝામાં કિપચોગે 26 સેકન્ડના અંતરથી આ સિદ્ધિ ચૂકી ગયો હતો.