પરેડ બસ ઉપરથી પડતા-પડતા માંડ બચ્યા મેસ્સી સહિત આર્જેન્ટિનાના પાંચ ખેલાડીઓ

કતારમાં રમાયેલા ફૂટબોલ વર્લ્ડ કપમાં આર્જેન્ટિનાની ટીમ ફાઈનલમાં આર્જેન્ટિનાને હરાવીને ચેમ્પિયન બની. વર્લ્ડ ચેમ્પિયન બન્યા બાદ આર્જેન્ટિના પહોંચેલી લાયનલ મેસ્સીની આગેવાનીવાળી ટીમનું ભવ્ય સ્વાગત કરવામાં આવ્યું હતું. એક ખુલ્લી બસ પર તેમની પરેડ કરવામાં આવી હતી. બ્યુનોસ આયર્સમાં હજારોની સંખ્યામાં લોકો પોતાની વર્લ્ડ ચેમ્પિયન ટીમના સ્વાગત માટે ઉમટી પડ્યા હતા. ટીમના ખેલાડીઓ એક ખુલ્લી બસમાં લોકોનું અભિવાદન ઝીલી રહ્યા હતા. જોકે, ત્યારે એક દુર્ઘટના બનતા રહી ગઈ હતી.

આ પરેડ દરમિયાન રોડ્રિગો ડી પૌલ, નિકોલસ ઓટામેન્ડી, લાયનલ મેસ્સી, લિઆન્દ્રો પેરેડીસ અને એન્જલ ડી મારિયા બસમાં ટોચ પર બેઠા હતા. ત્યારે એક જાડો વાયર રસ્તામાં આવ્યો હતો. જોકે, બસ ધીમી ચાલી રહી હતી અને ખેલાડીઓની નજર તેના પર ગઈ તે સાથે જ તેઓ નીચે નમી ગયા હતા અને પડવાથી બચી ગયા હતા. જો તેમનું ધ્યાન ન ગયું હોત તો અકસ્માત સર્જાઈ શક્યો હોત.

બસમાં વર્લ્ડ કપ ટ્રોફી સાથે લઈને બેઠો હતો. જ્યારે તેઓ વાયરથી બચી ગયા હતા ત્યારે એકબીજા સામે જોઈને હસવા લાગ્યા હતા. બાદમાં આર્જેન્ટિનાના એક પત્રકારે જણાવ્યું હતું કે, વાયરથી ખેલાડીઓ બચી ગયા હતા પરંતુ પેરેડીસના માથા પરથી ટોપી પડી ગઈ હતી. જોકે, તેઓ નસીબદાર રહ્યા અને સમય સૂચકતા વાપરીને પોતાને બચાવી લીધા હતા.

આર્જેન્ટિનાની ટીમે કતારમાં રમાયેલા વર્લ્ડ કપની ફાઈનલમાં ફ્રાન્સને પેનલ્ટી શૂટઆઉટમાં 4-2થી પરાજય આપ્યો હતો. નિર્ધારીત સમયમાં મેચ 2-2થી બરાબરી પર રહી હતી. ત્યારબાદ 30 મિનિટનો એક્સ્ટ્રા ટાઈમ આપવામાં આવ્યો હતો. જેમાં પણ બંને ટીમોએ 1-1 ગોલ નોંધાવ્યો હતો. આમ 120 મિનિટમાં મેચ 3-3થી બરાબરી પર રહી હતી અને અંતે પેનલ્ટી શૂટઆઉટની મદદ લેવામાં આવી હતી. વર્લ્ડ કપ જીત્યા બાદ આર્જેન્ટિનાની ટીમ પરત ફરી ત્યારે તેમને લઈને આવેલા પ્લેનમાંથી મેસ્સી ટ્રોફી સાથે સૌ પ્રથમ બહાર આવ્યો હતો.

વર્લ્ડ કપ જીતીને મેસ્સીએ આર્જેન્ટિના સાથે પોતાનું પણ સ્વપ્ન પૂર્ણ કર્યું હતું. આર્જેન્ટિના 36 વર્ષ બાદ વર્લ્ડ ચેમ્પિયન બની છે. મેસ્સી માટે કતારનો વર્લ્ડ કપ યાદગાર રહ્યો છે. ફાઈનલમાં તેણે બે ગોલ નોંધાવ્યા હતા. આ ઉપરાંત તેણે ટુર્નામેન્ટમાં શ્રેષ્ઠ ખેલાડીને આપવામાં આવતી ગોલ્ડન બોલની ટ્રોફી પણ જીતી હતી.