ચેસ ઓલિમ્પિયાડમાં ભારતે રચ્યો ઈતિહાસ, પ્રથમ વખત બન્યું ચેમ્પિયન

નવી દિલ્હીઃ ભારતીય ટીમે રવિવારે પ્રથમ વખત ફિડે ઓનલાઈન ચેસ ઓલિમ્પિયાડ જીતીને ઈતિહાસ રચી લીધો છે. જોકે, ભારત અને રશિયાને સંયુક્ત રીતે ચેમ્પિયન જાહેર કરવામાં આવ્યા છે. ફાઈનલમાં ત્યારે મૂંઝવણ ભરેલી પરિસ્થિતિ ઊભી થઈ હતી જ્યારે ભારતીય ટીમના ખેલાડી નિહાલ સરીન અને દિવ્યા દેશમુખનું ઈન્ટરનેટ કનેક્શન જતું રહ્યું હતું. ચેસ ઓલિમ્પિયાડની ફાઈનલમાં બીજા રાઉન્ડમાં આવું થયું હતું અને તેના કારણે ભારતે સત્તાવાર અપીલ કરી હતી.
ફિડે અધ્યક્ષ આર્કેડી ડ્વોરકોવિકે બાદમાં બંને ટીમોને જ ગોલ્ડ મેડલ આપવાનો નિર્ણય કર્યો હતો. ચેસ ઓલિમ્પિયાડના ઈતિહાસમાં ભારત પ્રથમ વખત ચેમ્પિયન રહ્યું છે. રશિયાએ 24 વખત (18 વખત સોવિયત સંઘ) આ ટુર્નામેન્ટ જીતી છે. ભારતના દિગ્ગજ અને ભૂતપૂર્વ વર્લ્ડ ચેમ્પિયન વિશ્વનાથન આનંદે સોશિયલ મીડિયા પર ખુશી વ્યક્ત કરી છે. તેણે રશિયાને પણ અભિનંદન પાઠવ્યા હતા.
અગાઉ પ્રથમ લેગની ફાઈનલમાં બંને ટીમોએ શ્રેષ્ઠ પ્રદર્શન કર્યું હતું અને મુકાબલો 3-3થી ડ્રો રહ્યો હતો. વિદિત ગુજરાતી પાસે ઈયાન નેપોમનિઆચી વિરુદ્ધ જીતવાની તક હતી પરંતુ તે ગેમ ડ્રો રહી હતી. જ્યારે કોનેરુ હમ્પી અને કેટરીના લાગનો વચ્ચેની મેચ પણ ડ્રો રહી હતી. જ્યારે ડી. હરિકા અને એલેક્ઝાન્ડ્રા કોસ્ટેનિઉકનું પરીણામ પણ એ જ રહ્યું હતું.
બીજા લેગની ફાઈનલમાં વિદિતનો મુકાબલો ડેનિલ ડુબોવ સામે હતો અને વિશ્વનાથન આનંદની મેચ નેપો સામે હતી જે બંને ડ્રો રહી હતી. હરિકાની મેચ એલેક્ઝાન્ડ્રા કોસ્ટેનિઉક સામે હતી અને તે પણ ડ્રો રહી હતી. જોકે, સર્વરમાં ખામી સર્જાતા હમ્પી ગેમ હારી ગઈ હતી. બાદમાં ફિડેએ બંને ટીમોને ચેમ્પિયન જાહેર કરી હતી.