એશિયન ગેમ્સ : પુરુષ બાદ ભારતીય મહિલા હૉકી કમાલ, કઝાકિસ્તાનને 21-0થી કચડ્યું!

I am Gujarat

ભારતીય મહિલા હૉકીની કમાલ

ભારતીય મહિલા હૉકી ટીમે ઈન્ડોનેશિયામાં આયોજિત 18મી એશિયન ગેમ્સમાં ગજબનું પ્રદર્શન કરતા મંગળવારે રમાયેલી મેચમાં કઝાકિસ્તાનને 21-0થી કચડી નાખ્યું. પૂલ-બીની આ મેચમાં કઝાકિસ્તાનની ટીમ એકદમ લાચાર દેખાઈ, ભારતીય મહિલાઓએ ત્રણ ક્વાર્ટરમાં 16-0ની લીડ મેળવી લીધી હતી અને છેલ્લા ક્વાર્ટરમાં વધુ 5 ગોલ ફટકારી 21-0થી મેચ જીતી લીધી.

એક ગોલ માટે વર્લ્ડ રેકોર્ડ ચૂકી ગઈ ટીમ

ઉલ્લેખનીય છે કે, એક દિવસ પહેલા જ ભારતીય પુરુષ હૉકી ટીમે મેજબાન ઈન્ડોનેશિયાને 17-0થી હરાવી પોતાના અભિયાનની શરૂઆત કરી હતી. આ જ રિધમને મહિલા ટીમે પણ જાળવી રાખી અને કમાલનું પ્રદર્શન કરતા એક પછી એક ગોલ ફટકાર્યા. જોકે, ભારતીય ટીમ પોતાનો એશિયન ગેમ્સનો રેકોર્ડ તોડી શકી નહીં. તેણે 1982ની એશિયન ગેમ્સમાં હૉંગકોન્ગને 22-0થી હરાવ્યું હતું.

નવ પ્લેયર્સે ફટકાર્યા ગોલ

ભારત તરફથી સૌથી વધુ નવનીત કૌરે 5 ગોલ ફટકાર્યા. તેણે 11મી, 12મી, 16મી, અને 48મી મિનિટ (2 ગોલ)માં ગોલ ફટકાર્યા. ગુરજીત કૌરે 4 ગોલ ફટકાર્યા, તેણે 8મી, 36મી, 44મી, 51મી મિનિટમાં ગોલ કર્યો. તેના સિવાય લાલરેમસિયામી અને વંદનાએ 3-3 ગોલ કર્યા જ્યારે લિલિમાએ 2 ગોલ ફટકાર્યા. નેહા, ઉદિતા, દીપ ગ્રેસ, નવજોત અને મોનિકાએ એક-એક ગોલ ફટકાર્યા. અગાઉ ટીમે પોતાની પહેલી મેચમાં મેજબાન ઈન્ડોનેશિયા 8-0થી હરાવ્યું હતું.