ધોનીની લાડલી ઝીવાના રેપની ધમકી, ઈરફાન પઠાણ સહિત અન્ય સેલેબ્સે કાઢી આકરી ઝાટકણી

આઇપીએલની આ સીઝનમાં એમએસ ધોનીની કેપ્ટનશીપ હેઠળની ચેન્નાઈ સુપર કિંગ્સ (CSK)નું પ્રદર્શન કથળી ગયેલું હોય તેવું લાગી રહ્યું છે. આ સ્થિતિમાં શુક્રવારે સોશિયલ મીડિયા પર ટ્રોલર્સે ધોનીને ટ્રોલ કરવાનું શરૂ કર્યું હતું. ધોનીની હારથી ગુસ્સે ભરાયેલા અને નારાજ કેટલાક દુષ્ટ લોકો, જે પોતાને ફેન્સ ગણાવે છે, તેમણે તો ત્યારે હદ વટાવી જ્યારે તેમણે ધોનીની 5 વર્ષની દીકરીને સોશિયલ મીડિયા પર બળાત્કારની ધમકી આપી હતી. જોકે ત્યારબાદ ટ્રોલર્સને ઉભી પૂંછડીએ ભાગવું પડ્યું હતું. ભારતીય ટીમના પૂર્વ ફાસ્ટ બોલર ઇરફાન પઠાણે પણ આવા લોકોને સણસણતો જવાબ આપ્યો હતો.

ઠાલવી અપશબ્દો ભરી પોસ્ટ
ધોનીની ટીમ આ સિઝનમાં 6 માંથી 2 મેચ જીતવામાં સફળ રહી છે, જ્યારે 6માં હારનો સામનો કરવો પડ્યો છે. આ ટૂર્નામેન્ટમાં ધોનીની ટીમ ફેવરિટ માનવામાં આવતી હતી. જોકે, દરેક જાણે છે કે હારવું અને જીતવું એ રમતનો ભાગ છે. પરંતુ સોશિયલ મીડિયા પર કેટલાક ટ્રોલ્સે ધોની તેમ જ તેની પત્ની સાક્ષી ધોનીના સોશિયલ મીડિયા એકાઉન્ટ્સ પર અપશબ્દોભરી પોસ્ટ કરી હતી.


આમાંથી કેટલાક ટ્રોલ્સે તો ધોનીની દીકરી ઝીવા પર દુષ્કર્મની પણ ધમકી આપી હતી. સોશિયલ મીડિયા પર અનેક ટ્રોલર્સે આ ઘૃણાસ્પદ કૃત્ય સામે અવાજ ઉઠાવ્યો હતો. ભૂતપૂર્વ ભારતીય ઝડપી બોલર અને ક્રિકેટ કમેન્ટેટર ઈરફાન પઠાણે પણ આવા ટ્રોલ્સને યોગ્ય અને સણસણતો જવાબ આપ્યો હતો.


પઠાણે એક ટ્વિટમાં લખ્યું કે, 'બધા ખેલાડીઓ પોતાનું શ્રેષ્ઠ પ્રદર્શન આપી રહ્યા છે. કેટલીકવાર આ કામ નથી થઈ શકતું. પણ આમ કરવાથી કોઈનાં બાળકને ધમકાવવાનો અધિકાર કોઈને પણ નથી મળી જતો.'


પઠાણની વાત સાથે સહમતિ દર્શાવતાં અને ટ્રોલર્સની આવી છેલ્લી પાયરીની હરકત પર દુઃખ વ્યક્ત કરતા એક યૂઝરે પઠાનને રિપ્લે આપ્યો કે, "ભારત ખૂબ જ ખોટી દિશામાં ચાલે છે. દરેક જગ્યાએ માત્ર નકારાત્મકતા જ નકારાત્મકતા જોવા મળે છે." ત્યારે પઠાણે આ બાબતનો જવાબ આપતા લખ્યું કે, 'ભારત નહીં. લોકો.'

અન્ય સેલેબ્સે પણ કાઢી ઝાટકણી
એક્ટ્રેસ અને કોંગ્રેસી નગ્માએ ટ્વીટ કર્યું, 'આપણે એક રાષ્ટ્ર તરીકે ક્યાં જઈ રહ્યાં છીએ? કેટલું વિચિત્ર છે કે ધોનીની પાંચ વર્ષની લાડલી દીકરી ઝીવા પર બળાત્કારની ધમકી આપવામાં આવે છે. પ્રધાનમંત્રીજી, આપણા દેશમાં શું થઈ રહ્યું છે?

કર્ણાટકના જયનગરના ધારાસભ્ય સૌમ્યા રેડ્ડીએ કહ્યું કે, આ ખૂબ જ પરેશાન કરનારી વાત છે. આપણા દેશમાં શું થઈ રહ્યું છે તે મને સમજાતું નથી. આપણે ક્યાં જઇ રહ્યા છીએ? રાજ્યસભાના સાંસદ પ્રિયંકા ચતુર્વેદીએ કહ્યું કે, સોશિયલ મીડિયા પ્લેટફોર્મનો દુરૂપયોગ કેવી રીતે કરવામાં આવે છે તેનું આ સૌથી ખરાબ ઉદાહરણ છે.