સાનિયા-હિંગીસની જોડીના અભિયાનનો અંત

એજન્સી : લંડન

સાનિયા મિર્ઝા અને માર્ટિના હિંગીસની ટોચની ક્રમાંકિત જોડીને ગુરૂવારે વિમ્બલ્ડન ટેનિસ ટૂર્નામેન્ટમાં વિમેન્સ ડબલ્સની ક્વાર્ટર ફાઈનલમાં પરાજયનો સામનો કરવો પડ્યો હતો આ સાથે જ વર્તમાન ચેમ્પિયન જોડીના અભિયાનનો પણ અંત આવ્યો હતો. સાનિયા-હિંગીસની જોડીનો હંગેરીની ટિમિયા બાબોસ અને કઝાકિસ્તાનની યારોસ્લાવા શ્વેદોવાએ સીધા સેટમાં ૨-૬, ૪-૬થી પરાજય આપ્યો હતો.

યુએસ ઓપન અને ઓસ્ટ્રેલિયન ઓપન ચેમ્પિયન ભારત-સ્વિસ જોડી લયમાં જોવા મળી ન હતી. આ પરાજય સાથે જ આ પ્રતિષ્ઠિત ટૂર્નામેન્ટમાં સાનિયાના અભિયાનનો પણ અંત આવ્યો હતો. આ પહેલા સાનિયા ક્રોએશિયાના તેના જોડીદાર ઈવાન ડોડિગ સાથે મિક્સ ડબલ્સમાંથી બહાર થઈ ગઈ હતી. જ્યારે મિક્સ ડબલ્સમાં હિંગીસની આશા જીવંત છે કેમ કે તેને ભારતના અનુભવી ખેલાડી લિએન્ડર પેસ સાથે મળીને ત્રીજા રાઉન્ડની મેચ રમવાની છે.

સાનિયા અને હિંગીસને શરૂઆતથી પોતાની સર્વિસ પર નિયંત્રણ રાખવામાં મુશ્કેલી પડી હતી. પ્રથમ સેટમાં બાબોસ અને શ્વેદોવાએ ત્રીજી અને સાતમી ગેમમાં આ જોડીની સર્વિસ તોડી હતી. ત્રીજી ગેમમાં હિંગીસે ડબલ ફોલ્ડ કરીને પોઈન્ટ ગુમાવ્યા હતા અને સર્વિસ પર ટીમને પોઈન્ટ અપાવવામાં નિષ્ફળ રહી હતી.