ક્યારેય વિચાર્યું ન હતું કે ટાઈમના કવર પેજ પર આવીશ
માનસી જોશીએ શુક્રવારે પોતાના ટ્વિટર એકાઉન્ટ પર જણાવ્યું હતું કે તેને ટાઈમ મેગેઝિનના કવર પેજ પર સ્થાન મળ્યું છે. તેણે ટ્વિટ કર્યું હતું કે ક્યારેય વિચાર્યું ન હતું કે કોઈ દિવસ હું ટાઈમના કવર પેજ પર આવીશ અને મને નેક્સ્ટ જનરેશન લીડર કહેવામાં આવશે. આ મારા માટે ઘણું મોટું સન્માન છે.
છ વર્ષની વયથી બેડમિન્ટન રમવાનું શરૂ કર્યું હતું
માનસીએ છ વર્ષની વયથી બેડમિન્ટન રમવાનું શરૂ કર્યું હતું અને તે પોતાના પિતા સાથે રમતી હતી. તેના પિતા ભાભા એટોમિક રિસર્ચ સેન્ટરના નિવૃત્ત વૈજ્ઞાનિક છે. ત્રણ વર્ષ બાદ માનસીએ સ્કૂલ સમર કેમ્પમાં બેડમિન્ટન પસંદ કર્યું હતું અને સ્કૂલ તથા ડિસ્ટ્રિક્ટ લેવલે રમી હતી. કેજે સોમૈયા કોલેજે ઓફ એન્જિનિયરિંગમાંથી 2010મા ગ્રેજ્યુએટ થયા બાદ તેણે સોફ્ટવેર એન્જિનિયરની નોકરી શરૂ કરી હતી. ઈન્ટ્રા કોર્પોરેટ બેડમિન્ટન ટુર્નામેન્ટ-2011મા તેણે ગોલ્ડ મેડલ જીત્યો હતો.
માનસીએ અકસ્માતમાં ગુમાવ્યો પગ
જોકે, 2011નું વર્ષ તેના માટે મોટો આઘાત લઈને આવ્યું હતું. બીજી ડિસેમ્બરે માનસી જ્યારે પોતાના ટુવ્હીલર પર નોકરીથી ઘરે આવી રહી હતી ત્યારે એક ટ્રકે તેને ટક્કર મારી હતી. જેના કારણે તેણે પોતાનો ડાબો પગ ગુમાવી દીધો હતો. માનસીને 45 દિવસ સુધી હોસ્પિટલમાં રહેવું પડ્યું હતું અને રિકવરી આવતા તેને ત્રણ મહિના લાગ્યા હતા. બાદમાં તેને પ્રોસ્થેટિક પગ લગાવ્યો હતો. જોકે, તેણે હિંમત હારી ન હતી અને 2012મા તેણે ફરીથી બેડમિન્ટન રમવાનું શરૂ કર્યું હતું અને તે જ કોર્પોરેટ ટુર્નામેન્ટમાં ભાગ લીધો હતો.
પછી પ્રોફેશનલ બેડમિન્ટન રમવાનું શરૂ કર્યું
માનસીના મિત્ર અને પેરા બેડમિન્ટન ખેલાડી નીરજ જ્યોર્જે માનસીને પ્રોફેશનલી બેડમિન્ટન રમવાની સલાહ આપી હતી. 2014મા તે પેરા એશિયન ગેમ્સ માટે ક્વોલિફાઈ થઈ શકી ન હતી પરંતુ ડિસેમ્બરમાં નેશનલ ગેમ્સમાં તેણે સિલ્વર મેડલ જીત્યો હતો અને ત્યારપછીના વર્ષે માર્ચમાં તેણે સ્પેનિશ પેરા બેડમિન્ટન ઈન્ટરનેશનલ ટુર્નામેન્ટમાં પણ ભાગ લીધો હતો. તેમાં તે મેડલ જીતી શકી ન હતી પરંતુ તેને આંતરરાષ્ટ્રીય સ્તરે મોટી ટુર્નામેન્ટમાં રમવાનો અનુભવ મળ્યો હતો અને તેનો આત્મવિશ્વાસ પણ વધ્યો હતો.
આકરી મહેનત કરીને મેળવી છે સફળતા
માનસીએ બાદમાં પોતાની ટ્રેનિંગ વધારી દીધી હતી. પોતાના કામ અને બેડમિન્ટન વચ્ચે બેલેન્સ કરવા માટે તેણે આકરી મહેનત કરી હતી. તે સવારે 4.30 વાગ્યે ઉઠી જતી હતી અને યોગથી શરૂ કર્યા બાદ તે ટ્રેનિંગ કરતી હતી. નોકરી પૂરી કર્યા બાદ પણ તે ટ્રેનિંગ કરરતી હતી. બાદમાં બેડમિન્ટનની કારકિર્દી પર ધ્યાન કેન્દ્રીત કરવા માટે તેણે 2016મા પોતાની નોકરી છોડી દીધી હતી. ત્યારબાદ 2018મા માનસી પુલેલા ગોપીચંદ એકેડેમીમાં ટ્રેનિંગ માટે હૈદરાબાદ ગઈ હતી. જ્યાં તે એક દિવસમાં ત્રણ સેસનમાં ટ્રેનિંગ લેતી હતી.