ઈન્ટરનેટ પર પ્રતિબંધથી મોબાઈલ કંપનીઓને દર કલાકે આટલા કરોડનું નુકસાન

નવી દિલ્હી: નાગરિકતા સુધારા કાયદા (CAA) અને નેશનલ રજિસ્ટર ઑફ સિટિઝન્સ (NRC) વિરુદ્ધ ભડકેલા પ્રદર્શન પર અંકુશ મેળવવા તાજેતરના દિવસોમં ઘણી જગ્યાએ ઈન્ટરનેટ બંધ કરવામાં આવ્યું. શુક્રવારે પણ યૂપીના ઘણા જિલ્લાઓમાં ઈન્ટરનેટ પર પાબંદી રહી. સામાન્ય લોકોને તેના ઘણી મુશ્કેલી થાય જ છે, સાથે જ ઈન્ટરનેટ કંપનીઓને પણ કરોડોનું નુકસાન વેઠવું પડે છે. જણાવવામાં આવી રહ્યું છે કે, ઈન્ટરનેટ પર પ્રતિબંધથી ટેલિકૉમ કંપનીઓને દર કલાકે 2.45 કરોડ રૂપિયાનું નુકસાન થયું છે. રૉયટર્સના રિપોર્ટમાં કહેવામાં આવ્યું છે કે, ભારતીય પ્રતિ માસ સરેરાશ 9.8 GB ડેટાનો સ્માર્ટફોન્સમાં ઉપયોગ કરે છે, જે દુનિયામાં સૌથી વધુ છે. સોશિયલ મીડિયા કંપની ફેસબુક અને તેના મેસેન્જર વ્હોટ્સએપ માટે યૂઝર્સની દૃષ્ટિએ આ દુનિયાનું સૌથી મોટું માર્કેટ છે. સેલ્યુલર ઑપરેટર્સ એસોસિએશન ઑફ ઈન્ડિયા (COAI)એ કહ્યું કે, ઈન્ટરનેટ પર પ્રતિબંધ પહેલો ઉપાય ન હોવો જોઈએ. મોબાઈલ સર્વિસ પ્રોવાઈડર ભારતી એરટેલ, વોડાફોન આઈડિયા અને રિલાયન્સ જિયો તેના સભ્યો છે. COAIના ડિરેક્ટર જનરલ રંજન મેથ્યૂએ કહ્યું કે, ‘અમે આ પાબંદીઓની કિંમત રેખાંકિત કરી છે. ઑનલાઈન એક્ટિવિટિઝ વધી ગઈ છે, અમારી ગણતરી અનુસાર ઈન્ટરનેટ બેનની કિંમત પ્રતિ કલાક 2.45 કરોડ રૂપિયા બેસે છે.’ રેવેન્યૂનું આ નુકસાન પહેલેથી જ દબાણમાં ચાલી રહેલા ભારતીય ટેલિકૉમ સેક્ટરની ચિંતા વધારનારું છે. પ્રાઈઝ વૉરના કારણે કંપનીઓનો ખજાનો ખાલી થઈ ચૂક્યો છે અને સુપ્રીમ કોર્ટના ઑર્ડર બાદ તેમને સરકારને મોટી રકમ ચૂકવવાની છે.