Jio Phone 5 પર ચાલી રહ્યું છે કામ, 500 રૂપિયાથી પણ ઓછી હોઈ શકે છે કિંમત

નવી દિલ્હી : રિલાયન્સ જિયોએ 1 હજાર રૂપિયાથી ઓછી કિંમતમાં 4G LTE ફોન લૉન્ચ કરીને ધૂમ મચાવી દીધી હતી. મુકેશ અંબાણીના નેતૃત્વવાળી જિયોએ ત્યારબાદ જિયો ફોન 2ને અપગ્રેડેડ વેરિયન્ટ તરીકે લૉન્ચ કર્યો હતો. જિયો ફોન 2 લૉન્ચ થયા બાદ પણ સૌથી પહેલા લૉન્ચ થયેલો જિયો ફોન વેચાઈ રહ્યો છે. અત્યારે તેને 699 રૂપિયામાં ખરીદી શકાય છે. હવે એવું લાગી રહ્યું છે કે, રિલાયન્સ જિયો વધુ એક સસ્તો હેન્ડસેટ બનાવવાની તૈયારી કરી રહી છે. જિયો ફોનના સસ્તા વેરિયન્ટ તરીકે ટૂંક સમયમાં જિયો ફોન 5 લૉન્ચ થઈ શકે છે.

91Mobilesના એક રિપોર્ટથી જાણવા મળે છે કે, જિયો ફોન 5 પર કામ ચાલી રહ્યું છે. નવો જિયો ફોન પણ એક ફીચર ફોન જ હશે. રિપોર્ટ્સ અનુસાર, જિયો ફોન 5 ઑરિજિનલ જિયો ફોનનું એક લાઈટ વર્ઝન હશે. આનો મતલબ એ છે કે, જિયો ફોનની વર્તમાન કિંમતથી ઓછી કિંમતે તેને વેચવામાં આવશે.

જો લીક્સનું માનીએ તો જિયો ફોન 5 399 રૂપિયાની કિંમતે લૉન્ચ કરવામાં આવી શકે છે. એટલે કે, તે અત્યાર સુધી બજારમાં આવનારો સૌથી સસ્તો ફોન બની શકે છે. જિયોના અત્યાર સુધીના રેકોર્ડને જોઈએ તો આવનારા ફીચર ફોનમાં 4G LTE કનેક્ટિવિટી હોવાની આશા છે.

JioPhone 5 : સંભાવિત ફીચર્સ

4G LTEની સાથે જિયો ફોન 5માં KaiOS પ્લેટફોર્મ આપવામાં આવી શકે છે. આનો મતલબ કે, તેમાં ઈન્ટરનેટ બ્રાઉઝરની સાથે કેટલીક એપ્સ પહેલેથી ઈન્સ્ટૉલ આવશે. આશા છે કે, ફોનમાં વ્હૉટ્સએપ, ગૂગલ, ફેસબુક જેવી એપ્સ પ્રી-લોડેડ આવશે.

રિપોર્ટમાં ઉલ્લેખ કરવામાં આવ્યો છે કે, જિયો ફોન 5થી જિયોના તમામ નંબર્સ પર મફત કૉલ કરી શકાશે. જોકે, ઈન્ટરનેટના ઉપયોગ માટે અલગથી રિચાર્જ કરાવવું પડશે. જિયો ફોનના વર્તમાન પ્લાન્સને જ જિયો ફોન 5 અથવા JioPhone Lite યૂઝર્સ માટે રજૂ કરવામાં આવી શકે છે. જિયો નવા જિયો ફોન માટે કેટલાક સસ્તા પ્લાન પણ લૉન્ચ કરી શકે છે.

કિંમત ઓછી રાખવા માટે ફોનમાં હાર્ડવેર સાથે સમાધાન કરવામાં આવશે. ફોનમાં ઓરિજિનલ જિયો ફોનની જેમ નાની LCD ડિસ્પ્લે અને કિપેડ આપવામાં આવી શકે છે. રિપોર્ટ્સ અનુસાર, જિયો ફોન લાઈટમાં વાઈ-ફાઈ અને બ્લૂટૂથ કનેક્ટિવિટી નહીં અપાય તેવી શક્યતા છે. આ ઉપરાંત કિંતમ ઓછી રાખવા માટે કેમેરા પણ ન હોવાના રિપોર્ટ્સ છે. લિમિટેટ સ્ટોરેજને કારણે તેમાં નવી એપ્સ પણ ડાઉનલોડ નહીં કરી શકાય.

JioPhone 5ની લૉન્ચ ડેટ વિશે હજુ કોઈ જાણકારી આપવામાં આવી નથી. જોકે, જિયો આ વર્ષે અથવા આગામી વર્ષે આવનારા જિયો સ્માર્ટફોન સાથે નવા જિયો ફોન વેરિયન્ટને પણ લૉન્ચ કરી શકે છે. જિયોએ તાજેતરમાં જ એલાન કર્યું છે કે, કંપનીનું પ્લાનિંગ ટચસ્ક્રીન અને એન્ડ્રોયડ OSની સાથે વ્યાજબી 4G સ્માર્ટફોન લાવવાની છે.