WhatsAppએ આપ્યું નવું ફીચર, સાત દિવસ બાદ આપોઆપ ગાયબ થશે મેસેજ

WhatsAppએ ગત અઠવાડિયે જ Disappearing Messages ફીચર લોન્ચ કરવાની જાણકારી આપી હતી. ફેસબુકની માલિકી ધરાવતી કંપનીએ જણાવ્યું હતું કે, એક મહિનાની અંદર તમામ એન્ડ્રોઈડ અને iOS યૂઝર્સને આ નવું ફીચર ઉપલબ્ધ કરાવાશે. હવે વોટ્સએપે એન્ડ્રોઈડ બીટા યૂઝર્સ માટે ડીસઅપિયરિંગ મેસેજીસ ફીચર રોલ આઉટ કરવાનું શરૂ કરી દીધું છે.

WABetaInfoના રિપોર્ટ પ્રમાણે, એન્ડ્રોઈડ પ્લેટફોર્મ પર વોટ્સએપ બીટા યૂઝર્સ હવે આ નવા ફીચરનો ઉપયોગ કરી શકશે. આ ફીચર ધીરે-ધીરે રોલ આઉટ થઈ રહ્યું છે અને હાલ વોટ્સએપ બીટા વર્ઝન 2.20.206.9માં આ ફીચર ઉપલબ્ધ છે. જો કે, રોલ આઉટની પ્રક્રિયા ધીમી હોવાથી તમામ બીટા યૂઝર્સ સુધી પહોંચવામાં થોડા સમય લાગી શકે છે. વોટ્સએપ બીટા યૂઝર્સ એપમાં જઈને ચેક કરી શકે છે નવું Disappearing Message ફીચર તેમને હજી સુધી મળ્યું છે કે નહીં. Contact Infoમાં જઈને આ નવું ફીચર આવ્યું છે કે નહીં તે ચેક કરી શકાય છે. ગ્રુપ ચેટ માટે યૂઝર્સ group infoમાં જઈને ચેક કરી શકે છે.

જો આ ફીચર એપમાં ઉપલબ્ધ હશે તો તમે તેને ટર્ન ઓન કરીને Disappearing Message ફીચર એક્ટિવેટ કરી શકો છો. એકવાર ચાલુ થયા પછી ચેટમાં મોકલેલો કોઈ પણ મેસેજ સાત દિવસ પછી આપોઆપ ગાયબ થઈ જશે. જો કે, આવું માત્ર એ મેસેજો માટે થશે જે ફીચર ઓન કર્યા પછી મોકલાયા હોય.

વોટ્સએપ ડિસઅપિયરિંગ મેસેજ ફીચરની કેટલીક મર્યાદાઓ પણ છે. સાત દિવસ પછી મેસેજ ગાયબ થયા પછી પણ તે નોટિફિકેશન પ્રીવ્યૂમાં દેખાશે. ઓરિજિનલ ટેક્સ્ટ મેસેજ ગાયબ થયા પછી પણ ચેટમાં કૉટ કરેલા અને રિપ્લાય કરેલા મેસેજમાં તે ટેક્સ્ટ દેખાશે. આ મેસેજ ફોરવર્ડેડ મેસેજ માટે પણ કામ નથી કરતો. મતલબ કે તમે કોઈ ડિસઅપિયરિંગ મેસેજ ફોરવર્ડ કર્યો છે તો તે ઓરિજિનલ ચેટમાંથી ગાયબ થશે પરંતુ ફોરવર્ડેડ ચેટમાં દેખાશે. તમે ડિસઅપિયરિંગ મેસેજનું બેકઅપ લઈ શકો છો પરંતુ ચેટ રિસ્ટોર થયા પછી પણ તે દેખાશે નહીં. આશા છે કે, વોટ્સએપ ડિસઅપિયરિંગ મેસેજનું ફીચર iOS બીટા એપમાં જલદી જ આપવામાં આવશે.