એડવેન્ચરના શોખીન અમદાવાદના ડોક્ટર દંપતીની સિદ્ધિમાં ઉમેરો થયો, પતિ-પત્નીએ સર કર્યો માઉન્ટ એવરેસ્ટ

અમદાવાદ/કાઠમંડુ- અમદાવાદ શહેરના એક ડોક્ટર દંપતીએ માઉન્ટ એવરેસ્ટ સર કરીને વધુ એક રેકોર્ડ પોતાના નામે કરી લીધો છે. શહેરની NHL મ્યુનિસિપલ મેડિકલ કોલેજમાં સર્જરીના પ્રોફેસર ડોક્ટર હેમંત લેઉઆ અને તેમના પત્ની ડોક્ટર સુરભી લેઉઆ શુક્રવારના રોજ સવારે સાડા આઠ વાગ્યાના સુમારે 8849 મીટરની ઉંચાઈ પર પહોંચી ગયા હતા. ઉલ્લેખનીય છે કે ડોક્ટર સુરભી લેઉઆ ગુજરાત વિદ્યાપીઠના ચીફ મેડિકલ ઓફિસર છે.
Satori એડવેન્ચરના મેનેજીંગ ડિરેક્ટર ઋષિ ભંડારી જણાવે છે કે, આ દંપતી પ્રથમ એવું ડોક્ટર દંપતી છે જેણે આ સિદ્ધિ મેળવી હોય. સ્થાનિક મીડિયા રિપોર્ટ્સ અનુસાર, ડોક્ટર દંપતીએ આ તકનો ઉપયોગ લોકોમાં પર્યાવરણનું રક્ષણ કરવાનો સંદેશ આપવા માટે કર્યો હતો. ઉલ્લેખનીય છે કે મે મહિનામાં હિમાલયની પર્વતમાળાઓમાં વાતાવરણ ચઢાણ માટે યોગ્ય હોય છે, જેના કારણે સેંકડો વિદેશી પ્રવાસીઓએ પણ મે મહિનામાં માઉન્ટ એવરેસ્ટ ચઢવાનો પ્રયાસ કર્યો હતો.

ઉલ્લેખનીય છે કે આ ડોક્ટર દંપતી વર્ષ 2021માં 8163 મીટરની ઉંચાઈ પર નેપાળમાં આવેલા માઉન્ટ મનસ્લુ પહોંચ્યા હતા, તે દુનિયાનો આઠમા ક્રમાંકનો સૌથી ઉંચો પર્વત છે. એવરેસ્ટ બેઝ કેમ્પ પર તેઓ બે વાર એકસાથે પહોંચ્યા હતા. ઉલ્લેખનીય છે કે ડોક્ટર હેમંત લેઉઆ માઉન્ટેન મૂવર્સ નામના એક ગ્રુપના સ્થાપ છે. આ ગ્રુપ દ્વારા પાછલા ઘણાં વર્ષોથી માત્ર ભારતના જ નહીં, વિદેશના પણ પર્વતારોહકો માટે કેમ્પનું આયોજન કરવામાં આવે છે. કેમ્પમાં માત્ર પ્રોફેશનલ લોકો જ નહીં, નવા લોકો પણ ભાહ લઈ શકે છે.

ફરવાના શોખીન છો પણ બજેટની સમસ્યા છે? હિમાચલની આ હોસ્ટેલમાં રહેશો તો અડધો થઈ જશે ખર્ચો
ડોક્ટર લેઉઆએ એક વર્ષ પહેલા માઉન્ટ એવરેસ્ટ સર કરવાનો પ્રયત્ન કર્યો હતો, પરંતુ ખરાબ વાતાવરણને કારણે તે પહોંચી નહોતા શક્યા. નિરાશ થવાના સ્થાને તેમણે વધારે મહેનત કરી અને એવરેસ્ટર બનવાના પોતાના સપનાને સાકાર કર્યું. આ દંપતી વર્ષ 2020માં કોરોના સંક્રમિત થયુ હતું. તેમણે આખું વર્ષ લોકોના જીવ બચાવવા દિવસ રાત એક કરીને કામ કર્યું. પરંતુ આખરે તેઓ શિકાર બન્યા હતા.

ગયા વર્ષે માઉન્ટ એવરેસ્ટ પર જતા પહેલા તેમણે અમારા સહયોગી ટાઈમ્સ ઓફ ઈન્ડિયા સાથેની વાતચીતમાં કહ્યું કે, દુનિયાના સૌથી ઉંચાઈ વાળા પર્વત પર જવું એ કોઈ પણ માઉન્ટેનરનું સપનું હોય છે. મારા માટે ત્યાં જવું એટલે જાણે માતાના ખોળામાં જવા સમાન છે. મારો હેતુ લોકોમાં જાગૃતિ લાવવાનો છે કે, આપણી બહુમૂલ્ય ધરતી અને વાતાવરણની સુક્ષાનો સંદેશ લોકો સુધી પહોંચાડવા માંગુ છું. અમારો હેતુ છે કે લોકો પ્રકૃત્તિ નજીક જાય અને સમજે કે આ પર્યાવરણને આગામી પેઢી માટે સાચવીને રાખવાનું છે.