જંગલનો આ ફોટો ચાડી ખાય છે કે માણસ ક્યારેય નહીં સુધરે, કચરો તો ફેલાવશે જ!

હવા, પાણીના પ્રદૂષણ અને ગ્લોબલ વોર્મિંગ પર સોશિયલ મીડિયા પર મિશન છેડનારી મનુષ્ય જાતિ ખાલી વાતો કરી જાણશે, પરંતુ પ્રકૃતિને ચોખ્ખી રાખવી કે એની સાચવણી કરવામાં પ્રક્ટિકલ ક્યારેય નહીં બને. આ વાતને સાચી પાડતો એક ફોટો સોશિયલ મીડિયા પર વાયરલ થયો છે. કોરોના જેવી મહામારીનો પ્રકોપ સહન કરી રહેલા મનુષ્યો એટલુ પણ નથી સમજી શકતા કે પ્રકૃતિને નુકસાન પહોંચાડવાનો અર્થ પોતાનો જ અંત કરવા જેવો છે.
સોશિયલ મીડિયા પર વાયરલ ફોટામાં જંગલનું સૌથી શરમાળ પ્રાણી દીપડો જોવા મળી રહ્યો છે પરંતુ એની પાસે એક વપરાયેલુ માસ્ક પણ પડેલુ છે. વૈશ્વિક કોરોના મહામારી આવ્યા બાદ આ સામાન્ય વાત બની ચૂકી છે કે રોડ-રસ્તા કે ગલીઓમાં વપરાયેલા માસ્ક પડેલા જોવા મળે છે. જે મહામારીને ફેલાવામાં મદદ કરે છે. પરંતુ માણસો આ કચરો હવે જંગલમાં પણ ફેલાવી રહ્યા છે. આ ફોટો એક વાઇલ્ડલાઇફ ફોટોગ્રાફરે ટ્વીટર પર શેર કર્યો છે. આ ફોટા શેર કરવાની સાથે તેમણે એવા બેદરકાર લોકોને સંદેશો આપવાનો પ્રયત્ન કર્યો છે. જે જ્યાં-ત્યાં કચરો ફેંકતા રહે છે. અહીં સુધી કે જંગલમાં પણ.

આ ફોટો શેર કરીને તેમણે એટલું જ સમજાવવાનો પ્રયત્ન કર્યો છે કે, મહામારીનો શિકાર બનેલી મનુષ્ય જાતિએ હવે સુધરી જવુ જોઇએ અને પ્રકૃતિને પ્રદૂષિત કરતા પહેલા પરિણામ વિચારી લેવું જોઇએ. વપરાયેલા માસ્ક જેમ-તેમ ફેંકી દેવાથી મહામારી ફેલાવાની શક્યતા વધી જાય છે, એમાં પણ જંગલમાં આવો કચરો ફેંકવાથી પ્રાણીઓમાં મહામારી ફેલાઇ શકે છે. જે કુદરતને સૌથી મોટુ નુકસાન પહોંચાડી શકે છે. જોકે આ ફોટો માત્ર જંગલની જ નહીં, પરંતુ પોતાની આસપાસ કચરો ના ફેલાવાનો સંદેશો પાઠવે છે.