ઓ બાપ રે.. નવી કાર શો-રૂમમાંથી કાઢતાની સાથે સીધી દીવાલે ઠોકી દીધી

નવી કાર જ્યારે શો-રૂમમાંથી બહાર નીકળી હોય ત્યારે સૌ કોઈ તેને જોતા હોય છે. આવામાં જો નવી કાર બહાર આવતા જ કોઈ અકસ્માત સર્જે તો? આવી જ એક ઘટનાનો વિડીયો સામે આવ્યો છે. જેમાં એક શખ્સે નવી કાર શો-રૂમમાંથી બહાર કાઢતાની સાથે દીવાલ સાથે અથડાવી દીધી છે. સોશિયલ મીડિયા પર આ વીડિયો ઘણો જ વાયરલ થઈ રહ્યો છે. કોમેડિયન અને એક્ટર સુનીલ ગ્રોવરે પણ દુર્ઘટનાનો વીડિયો શેર કરીને પોતાનો મત રજૂ કર્યો છે.

શો-રૂમના કર્મચારી કારના ડ્રાઈવરને કંઈક સમજાવતા હોય તેવું દેખાય છે. આ કારમાં કેટલાક લોકો બેઠેલા પણ દેખાય છે, આ પછી જેવી કાર શો-રૂમની બહાર આવે છે કે તરત ડ્રાઈવર નિયંત્રણ ગુમાવી દે છે અને અકસ્માત સર્જાઈ જાય છે. કાર દીવાલ સાથે અથડાઈ જાય છે. આ ઘટના ક્યાની છે તે માલુમ નથી પડ્યું પરંતુ ઓટોમેટિક કાર હોવાના કારણે ડ્રાઈવરથી કોઈ ભૂલ થઈ ગઈ હોવાનું અનુમાન લગાવવામાં આવી રહ્યું છે.

સુનિલ ગ્રોવરે આ કારનો વીડિયો શેર કર્યો છે અને લખ્યું છે કે, "નવી કાર, શો-રૂમથી સીધી સર્વિસ સ્ટેશન પહોંચી." સુનિલ ગ્રોવરે શેર કરેલો વીડિયો 10 લાખથી વધુ લોકોએ પસંદ કર્યો છે અને મોટી સંખ્યામાં આ વીડિયો પર કમેન્ટ પણ આવી છે. સુનિલ ગ્રોવરે આ વીડિયો રવિવારે ફની અંદાજમાં શેર કર્યો હતો.


આ કિઆ કાર્નિવલ (Kia Carnival) કાર છે અને તેની એક્સ શો-રૂમ પ્રાઈઝ 25 લાખથી વધુ થાય છે. આ લક્ઝુરિયસ કારનો અકસ્માત જોઈને સોશિયલ મીડિયા પર યુઝર્સ જીવ બાળી રહ્યા છે. ઘણાં એવું પણ કહી રહ્યા છે કે આટલી મોટી અને ઓટોમેટિક કાર કોઈ દિવસ પ્રેક્ટિસ કર્યા વગર ચલાવવાનું સાહસ આમની જેમ મોંઘું પડી શકે છે.

સામાન્ય રીતે લગભગ તમામ કાર શો-રૂમમાં કારની ડિલિવરી વખતે કારને કસ્ટમરના ઘરે પહોંચાડવાની સુવિધા આપવામાં આવતી હોય છે. પરંતુ આજના કોરોનાકાળમાં લોકોનું એવું માનવું હોય છે કે કોઈ અન્ય વ્યક્તિ કારને સ્પર્શ કરે તેના બદલે આપણે જ તેનો ઉપયોગ કરીએ. આ કિસ્સામાં પણ માનવામાં આવે છે કે ગ્રાહકે કાર પોતાની મેળે ઘરે લઈ જવાની તૈયારી બતાવી હશે અને આ દુર્ઘટના સર્જાઈ હોઈ શકે છે.