બસ આ જ જોવાનું બાકી રહી ગયુ હતું? સુરતના આ ચા વાળાએ કેળું, સફરજન, ચીકૂ નાખીને બનાવી ‘ફ્રૂટ ચા’

ભારતીયો અને ચા વચ્ચેનો સંબંધ કેવો છે એ આપણે સૌ જાણીએ છીએ. મોટાભાગના લોકોની સવાર ચા સાથે થતી હોય છે, ઓફિસમાં ચા જોઈએ, કોઈના ઘરે જાય તો ચા, મિત્રો એકઠા થાય તો ચા, વરસાદ પડે તો ચા, રાતના સમયે પણ લોકો ચા પીતા હોય છે. ચાની કીટલી પર ચુસ્કી લેતા લેતા દુનિયાભરના મુદ્દાઓની ચર્ચા લોકો કરતા હોય છે. કોઈ કાર્યક્રમ હોય તો તેમાં પણ ચા ન હોય તો તે અધૂરો લાગે. ચા આપણા જીવનનો એક અભિન્ન ભાગ છે. ચા પણ અનેક પ્રકારની હોય છે. દરેક પ્રકારના લોકોને અલગ અલગ પ્રકારની ચા પસંદ હોય છે. કોઈને મીઠી ચા પસંદ હોય, કોઈને સાવ ફીકી ચા ભાવતી હોય છે, કોને દૂધ વધારે જોઈએ તો કોઈ માત્ર નામ બરાબરનું દૂધ હોય તેવી ચા પીતું હોય છે. કોઈને કડક ચા ભાવે તો કોઈને વધારે ઉકાળેલી ચા નથી ભાવતી હોતી. આ સિવાય દુકાનોમાં અલગ અલગ પ્રકારની અલગ અલગ કંપનીઓની ચા મળતી હોય છે. પરંતુ તાજેતરમાં સોશિયલ મીડિયા પર જે ચાનો વીડિયો વાયરલ થઈ રહ્યો છે તે જોઈને ચાના ચાહકો માથું પકડીને બેસી જશે.


સુરતથી ચાનો એક વીડિયો સામે આવ્યો છે. આ વીડિયો જોઈને લોકો કહી રહ્યા છે કે આખરે કોઈ આ પ્રકારની ચા કેવી રીતે પી શકે છે? લોકો કહી રહ્યા છે કે આવી ચા પીવીએ તો રિયાલિટી શૉ ખતરોં કે ખિલાડીનો એક ટાસ્ક હોઈ શકે છે. વીડિયોમાં જોઈ શકાય છે કે ચાવાળો ફ્રૂટ ચા બનાવી રહ્યો છે. હા, ફળો વાળી ચા.


વીડિયોમાં જોઈ શકાય છે કે ચા બનાવનાર વ્યક્તિ સૌથી પહેલા ગરમ દૂધમાં કેળું નાખે છે, ત્યારપછી ચા પત્તી નાખે છે. ત્યારપછી તે ચામાં એક ચીકૂ અને સફરજન છીણીને નાંખે છે. આ તમામ ફળો નાખ્યા પછી ચાને ઉકાળે છે. જ્યારે ચા વ્યવસ્થિત ઉકળી જાય છે પછી તેને ગાળીને સર્વ કરે છે. જો કે એક વાત કહી શકાય કે, આ પ્રકારે ફળો નાખ્યા પછી પણ ચા દેખાવમાં સામાન્ય ચા જેવી જ લાગે છે. આ ચા કપમાં પડી હોય તો કોઈ કહી ના શકે કે તેમાં આ પ્રકારનો અખતરો કરવામાં આવ્યો હશે.

આ ફ્રૂટ-ટીનો વીડિયો અમાર સોની નામના ફૂડ વ્લોગરે પોતાના સોશિયલ મીડિયા હેન્ડલ પર અને યૂટ્યુબ ચેનલ પર શેર કર્યો છે. અત્યાર સુધી લાખો લોકો આ વીડિયો જોઈ ચૂક્યા છે. અને કમેન્ટ સેક્શનમાં તો જાણે ધમાલ મચી ગઈ છે. લોકો આ વીડિયો જોઈને પ્રતિક્રિયા આપી રહ્યા છે. એક યુઝરે લખ્યું છે કે, આ ચા નથી હોટ મિલ્ક શેક છે. એક યુઝરે લખ્યું કે, આ તો હદ થઈ ગઈ છે, બસ આ જ જોવાનું બાકી રહી ગયું છે.



વીડિયોમાં વ્લોગરે જણાવ્યું છે કે સુરત શહેરના ગોપીપુરા વિસ્તારમાં આ પ્રકારની ચા મળે છે. આ ચાની દુકાનનું નામ અનોખી ફ્રુટ ટી છે. ચા વાળાનું નામ મનિષભાઈ છે. વીડિયોમાં મનિષભાઈ કહે છે કે તેઓ પાછલા 12 વર્ષથી આ પ્રકારની ચા બનાવે છે.