દાંતની સફાઈ કરતી વખતે યુવતી ગળી ગઈ ટૂથબ્રશ, સીધું પહોંચી ગયું પેટમાં!

સાઉદી અરેબિયામાં ડોકટરોની ટીમે ઓપરેશન કર્યા બાદ મહિલાના પેટમાંથી ટૂથબ્રશ બહાર કાઢ્યું છે. સ્થાનિક મીડિયા અહેવાલો અનુસાર, ટૂથબ્રશ ગળી જનારી મહિલાની સારવાર મક્કાની 'એ 1 નૂર હોસ્પિટલમાં' કરવામાં આવી છે. પેટમાંથી ટૂથબ્રશ કાઢ્યા પછી મહિલાએ જાતે કહ્યું કે કેવી રીતે ટૂથબ્રશ તેના પેટમાં પહોંચી ગયું હતું.

20 વર્ષીય મહિલાએ હોસ્પિટલના ઈમરજન્સી વિભાગના ડોકટરોને જણાવ્યું કે બ્રશ કરતી વખતે તે અચાનક ટૂથબ્રશ ગળી ગઈ હતી. બ્રશ અચાનક લપસી ગયું અને તેના ગળામાં પહોંચી ગયું. તેણે બ્રશને બહાર કાઢવાનો પ્રયાસ કર્યો પરંતુ તે સીધું પેટમાં જતું રહ્યું.

મહિલા સારવાર માટે હોસ્પિટલમાં આવી ત્યાર બાદ તેની તબીબી તપાસ, એક્સ-રે અને સીટી સ્કેન કરાવ્યા હતા. આ પછી ડોકટરો મહિલાને ઓપરેશન થિયેટરમાં લઈ જવામાં મોડું કર્યું નહીં. માત્ર 20 મિનિટમાં જ ગેસ્ટ્રોએન્ટેરોલોજિસ્ટ ડો.મહમદ ફૌઝીની ટીમને ગેસ્ટ્રોકોપી દ્વારા મહિલાના પેટમાં ટૂથબ્રશ શોધી કાઢ્યું.

હોસ્પિટલની તબીબી સેવાના સહાયક નિયામક ડો.મોતલખ અલ માલ્કીએ જણાવ્યું હતું કે ટૂથબ્રશને મહિલાના પેટમાંથી સફળતાપૂર્વક કાઢવામાં આવ્યું છે અને હવે તે સંપૂર્ણ સ્વસ્થ છે.