આનંદ મહિંદ્રાએ શેર કર્યો વીડિયો, 'બળદ ગાડા'ની જગ્યાએ જોવા મળી 'બળદ એમ્બેસેડર'

બળદની ગાડીઓ ઘણી જોઈ હશે. પરંતુ ઉદ્યોગપતિ આનંદ મહિન્દ્રાએ એવી બળદ ગાડીનો એક વીડિયો શેર કર્યો છે, જેને જોઈને લોકોની આંખો પહોળી થઈ ગઈ છે! જ્યારે કેટલાક લોકોને પોતાની આંખો પર વિશ્વાસ થતો નથી. સ્વાભાવિક છે કે જ્યારે તમે વિડિઓ જોશો, ત્યારે તમને પણ લાગશે કે બળદ જુદા છે અને એમ્બેસેડર કાર અલગ છે. પરંતુ થોડા સમય પછી માની જશો કે બંનેને મેળીને એક ખાસ પ્રકારની બળદ ગાડી બનાવવામાં આવી છે. આ વાત એ બાબતની સાબિતી છે કે ભારતીયો જુગાડ કરવામાં નંબર 1 છે.

આનંદ મહિન્દ્રાએ 23 ડિસેમ્બરે આ વિડિઓ શેર કર્યો હતો. આ સાથે તેમણે કેપ્શનમાં લખ્યું છે, 'મને નથી લાગતું કે એલેન મસ્ક અને ટેસ્લા આ ઓછી કિંમતની રિન્યુએબલ ઊર્જાનો બળતણ તરીકે ઉપયોગ કરતી કાર સાથે સ્પર્ધા કરી શકશે...' સમાચાર લખાય ત્યાં સુધી આ વીડિયોને 24 હજારથી વધુ વ્યૂ અને 2.5 હજારથી વધુ લાઈક્સ મળી છે. . તેમજ, સેંકડો લોકોએ પણ આ અંગે પ્રતિક્રિયા આપી છે.


આ 50 સેકન્ડનો વિડિઓની શરુઆત એક બળદના દેખાવાથી થાય છે. જો કે, થોડી જ સેકંડમાં ખબર પડે છે કે આ કોઈ સામાન્ય બળદ ગાડી નથી. કારણ કે બળદની પાછળ એમ્બેસેડર કાર જોડાયેલી હોય છે, જોકે આ કારનો ભાગ લાકડાથી બનેલો હોય તેવું લાગી રહ્યું છે. અડધી એમ્બેસેડર કાર અને બળદની વચ્ચેની જગ્યામાં એક માણસ બેઠો છે, જે બળદને કાબૂમાં રાખે છે અને તેમને આગળ વધવા અને રોકાવાની સૂચના આપે છે.