એક સાથે 15 ગગનચુંબી ઈમારતોને તોડી પડાઈ, 45 સેકન્ડમાં તો તમામ બિલ્ડિંગ ગાયબ જાણે મેદાન

સોશિયલ મીડિયા પર 15 ગગનચૂંબી ઈમારતોના એકપછી એક ધડાધડ ધરાશાયી થઈને તૂટી પડવાનો વીડિયો ખૂબ જ જોવા મળી રહ્યો છે. આ વીડિયો હકીકતમાં ચીનના યુનાન પ્રાંતના કાનમિંગનો છે. જ્યાં આ ગગનચુંબી ઇમારતો 8 વર્ષ પછી પણ પૂર્ણ રીતે ન બંધાવાથી તેને એકસાથે તોડી પાડવામાં આવી હતી. ચીનની સરકારી સમાચાર સંસ્થા શિન્હુઆ ન્યુઝ અનુસાર આ ઇમારતોમાં 4.6 ટન વિસ્ફોટકો 85,000 બ્લાસ્ટિંગ પોઇન્ટ પર રાખવામાં આવ્યા હતા. બિલ્ડિંગ તોડી પાડવાનું આ મિશન માત્ર 45 સેકન્ડમાં સફળતાપૂર્વક પૂર્ણ કરવામાં આવ્યું હતું.

કનમિંગ ડેઇલીના અહેવાલમાં જણાવાયું છે કે 'ઇમર્જન્સી રેસ્ક્યુ ડિપાર્ટમેન્ટ્સ' એ ઇમારતોને તોડી પાડવા દરમિયાન લોકોની સલામતીને સુનિશ્ચિત કરવા માટે 2,000 થી વધુ કર્મચારીઓની આઠ ઇમરજન્સી રેસ્ક્યુ ટીમની રચના કરી હતી. જેમાં સાઇટ ફાયર રેસ્ક્યુ ટીમો, વ્યાપક ઇમરજન્સી ટીમો, પૂર નિયંત્રણ ઇમરજન્સી ટીમ અને સિટી મેનેજમેન્ટની ટીમ સહિતના વિભાગોમાંથી કર્માચારીઓનો સમાવેશ કરવામાં આવ્યો હતો.

અહેવાલોમાં કહેવામાં આવ્યું હતું કે આ 15 ગગનચુંબી ઇમારતોને તોડી પાડતા પહેલા આજુબાજુની તમામ દુકાનો બંધ કરાવવામાં આવી હતી અને આ ખતરનાક વિસ્ફોટ કરતા પહેલા નજીકમાં રહેતા લોકોને પણ આ વિસ્તારમાંથી બહાર કાઢવામાં આવ્યા હતા. ચીનના અધિકારીઓએ આ ઇમારતોને તોડી પાડવાનું નક્કી કર્યું કારણ કે આ ઇમારતો લાંબા સમયથી બિનજરૂરી રીતે ઊભી હતી, જેના ભોંયરામાં વરસાદના પાણી ભરાઈ જતાં હતાં. જેનાથી રોગચાળો ફેલાવાનો પણ ડર રહેતો હતો.

'તાઇવાન ન્યૂઝ'ના અહેવાલમાં કહેવામાં આવ્યું છે કે આ ઇમારતો લિયાંગ સ્ટાર સિટી ફેઝ II પ્રોજેક્ટનો ભાગ હતી, જેની કિંમત લગભગ 1 અબજ ચીની યુઆન એટલે કે લગભગ 11,38,81,80,000 રૂપિયા થતી હતી. જો કે, આ પહેલીવાર નથી કે ચીનમાં આટલા મોટા પાયે ગગનચૂંબી ઇમારતોને તોડી પાડવામાં આવી હોય. અગાઉ 2017 માં ઝેંગઝોઉમાં માત્ર 20 સેકન્ડમાં 36 ઇમારતો તોડી પાડવામાં આવી હતી.