વૃદ્ધા કોકપિટમાં મહિલા પાઈલટને જોઈને પોતાની જીભને રોકી ના શકી

રાજકારણ હોય કે રણભૂમિ ભારતીય મહિલાઓ દરેક ક્ષેત્રમાં આગળ વધી રહી છે. મહિલાઓની પ્રગતિ ઘણાં ક્ષેત્રો માટે કારગત સાબિત થઈ રહી છે. આવામાં મહિલાઓ એર હોસ્ટેસ સુધી સિમિત રહેવાના બદલે પાઈલટ તરીકે પણ સફળ થઈ રહી છે. આવી જ એક ભારતીય મહિલા પાઈલટની કહાની સામે આવી છે કે જેમાં બીજી મહિલાને એ જાણીને ભારે આશ્ચર્ય થાય છે કે એક મહિલા પણ પ્લેન ઉડાવી શકે છે. મહિલા પાઈલટે કરેલી ટ્વીટ ઘણી જ વાયરલ થઈ રહી છે.

વાત છે હના ખાન નામની મહિલા પાઈલટની કે જેણે 15 નવેમ્બરના રોજ એક ટ્વીટ કરીને પોતાની સાથે બનેલી રમૂજ ઘટના અંગે જણાવ્યું છે. એક વૃદ્ધ હરિયાણાની મહિલા મુસાફરે પોતાની મુસાફરી દરમિયાન કોકપિટ જોવાની ઈચ્છા વ્યક્ત કરી હતી. આ દરમિયાન તેઓ જ્યારે કોકપિટમાં પહોંચ્યા તો જોયું કે કોઈ પુરુષ નહીં પણ એક મહિલા જ પ્લેન ઉડાવી રહી હતી. આ પછી હરિયાણાની બોલીમાં વૃદ્ધા જે કહ્યું તે સાંભળીને મહિલા પાઈલટ હસી-હસીને લોટપોટ થઈ ગઈ હતી.

કોકપિટ જોવાની ઈચ્છા વ્યક્ત કરનારી મહિલાએ પાઈલટ સીટ પર એક મહિલાને બેઠેલી જોઈ તો તેમને ભારે આશ્ચર્ય થયું. તેમનાથી હરિયાણાની બોલીમાં એકદમ બોલાઈ ગયું કે, "ઓય યહાં તો છોરી બેઠી!" આ સાંભળીને ત્યાં બેઠેલા લોકો હસવા લાગ્યા. વૃદ્ધ મહિલા મુસાફરે જે પ્રમાણેનું રિએક્શન આપ્યું હતું તે સાંભળીને લોકો પોતાનું હસવું રોકી જ ના શક્યા.


હનાએ પોતાની વાત ટ્વીટર દ્વારા 15 નવેમ્બરે જણાવી હતી. આ ટ્વીટને અત્યાર સુધીમાં ઘણાં લોકોએ પસંદ કરી છે. 16 હજાર જેટલા લોકોએ આ ટ્વીટને પસંદ કરી છે જ્યારે 1 હજાર કરતા વધારે લોકોએ તેને રિ-ટ્વીટ કરી છે અને 300થી વધારે લોકોએ પોતાના મંતવ્યો રજૂ કર્યા છે.

પાઈલટ હનાએ કરેલી ટ્વીટ પર લોકોએ વિવિધ સવાલો પણ કર્યા છે અને તેના પણ હનાએ જવાબ આપ્યા છે. જેમાં એક યુઝરે પૂછ્યુ છે કે શું મુસાફર કોકપિટ જોઈ શકે છે? જેના જવાબમાં હના લખે છે કે, હા જો અમે પ્લેન ઉતારી દીધું હોય અને પાઈલટ વ્યસ્ત ના હોય તો તમે વિનંતી કરી શકો છો.