મર્સિડીઝ બેન્ઝ ઈન્ડિયાના CEO ટ્રાફિકમાં ફસાયા, કારમાંથી ઉતરી રિક્ષામાં બેસીને નીકળી ગયા

પુણે: મર્સિડીઝ-બેન્ઝ ઈન્ડિયાના એમડી અને સીઈઓ માર્ટિન શ્વેન્ક (Martin Schwenk)ની એક ઈન્સ્ટાગ્રામ પોસ્ટ સોશિયલ મીડિયા પર ચર્ચાનો વિષય બની ગઈ છે. તેમણે ઓટો રિક્ષામાં મુસાફરી કરતી વખતે એક તસવીર શેર કરી અને જણાવ્યું કે તેમની એસ-ક્લાસ કાર ટ્રાફિકમાં ફસાઈ જતાં તેમણે ઓટો રિક્ષા લીધી. ઘણા લોકો આ અંગે પ્રતિક્રિયા આપી રહ્યા છે. સીઈઓની આ સ્ટાઈલ જોઈને કેટલાક લોકો તેમને ડાઉન ટુ અર્થ કહી રહ્યા છે. તમને જણાવી દઈએ કે, થોડા દિવસો પહેલા ટ્રાફિકમાં પોતાની કાર ફસાયા બાદ ગેસ્ટ્રોએન્ટેરોલોજી સર્જન ડોક્ટર ઈમરજન્સી સર્જરી માટે દોડીને હોસ્પિટલ પહોંચ્યા હતા, જેનો વીડિયો પણ વાયરલ થયો હતો.

શું છે સમગ્ર મામલો?

માર્ટિન શ્વેન્કે 29 સપ્ટેમ્બરે ઈન્સ્ટાગ્રામ પર એક તસવીર પોસ્ટ કરી અને કેપ્શનમાં લખ્યું – જો તમારી એસ-ક્લાસ (મર્સિડીઝ કાર) પુણેના શ્રેષ્ઠ રસ્તાઓ પર ફસાઈ જાય તો તમે શું કરશો? કદાચ કારમાંથી ઊતરીને થોડા કિલોમીટર ચાલવાનું શરૂ કરો અને પછી રિક્ષા લઈ લેશો? તેમની આ ઈન્સ્ટા પોસ્ટને અત્યાર સુધીમાં લગભગ સાતસો લાઈક્સ અને સેંકડો કોમેન્ટ્સ મળી છે.

યુઝર્સ માર્ટિનના વખાણ કરવા લાગ્યા

માર્ટિનની પોસ્ટ પર યુઝર્સે મિશ્ર પ્રતિક્રિયા આપી હતી. જ્યાં કેટલાક લોકોએ કહ્યું કે તમે અદ્ભુત કર્યું છે. એક યુઝરે લખ્યું કે તમે જમીન સાથે જોડાયેલા વ્યક્તિ છો. અન્ય એક યુઝરે લખ્યું- હું તો એસ-ક્લાસમાં જ બેસીને જલસા કરત. જ્યારે એક વ્યક્તિએ લખ્યું કે વડાપાવનો ઓર્ડર આપી દેવાનો હતો. આ અંગે તમારો શું અભિપ્રાય છે? અમને કોમેન્ટ સેક્શનમાં જણાવો!!

વાયરલ થઈ પોસ્ટ!