પાકિસ્તાનમાંથી મળી આવ્યું 1300 વર્ષ જૂનું ભગવાન વિષ્ણુનું પ્રાચીન મંદિર

પાકિસ્તાન અને ઈટાલિયન પુરાતત્વ વિભાગ દ્વારા ઉત્તર પશ્ચિમ પાકિસ્તાનના સ્વાટ જિલ્લાના એક પર્વતમાંથી 1,300 વર્ષ જૂનું હિન્દુ મંદિરને શોધી કઢાયું છે. આ મંદિરની શોધ બારીકોટ ખાંડાઈ ખાતે ખોદકામ દરમિયાન કરવામાં આવી હતી. એક માહિતી અનુસાર, આ મંદિર ભગવાન વિષ્ણુનું છે અને તેને હિન્દુ શાસન દરમિયાન અહીં બનાવવામાં આવ્યું હતું.

પાકિસ્તાનના ખૈબર પખ્તુનખ્વાના પુરાતત્ત્વીય વિભાગના વરિષ્ઠ અધિકારી ફઝલે ખલીકે ગુરુવારે આ વાતની પુષ્ટિ કરતા કહ્યું હતું કે, ભગવાન વિષ્ણુની મૂર્તિ અહીં સ્થાપિત કરવામાં આવી છે અને ઘણા વર્ષો પહેલા તેની પૂજા કરવામાં આવી હતી. તેમણે વધુમાં કહ્યું હતું કે, આ મંદિર હિન્દુ રાજવી કાળ દરમિયાન 1,300 વર્ષ પહેલા બનાવવામાં આવ્યું હતું.

પુરાતત્વ વિભાગના ફજલે ખલીકે જણાવ્યું કે, આ મંદિર 1300 વર્ષ પહેલા હિન્દુ શાહી કાળ દરમિયાન બનાવાયું હતું. હિન્દુ શાહી અથવા કાબુલ શાહી ( ઈ.સ 850 થી 1026 સુધી) એક હિન્દુ રાજવંશ હતો, જેણે કાબુલ ઘાટી (પૂર્વ અફઘાનિસ્તાન), ગાંધાર (આધુનિક પાકિસ્તાન) અને હાલના ઉત્તર પશ્ચિમ ભારતમાં શાસન કર્યું હતું. ઈટાલીના પુરાતત્ત્વ વિભાગના વડા ડો. લુકાએ જણાવ્યું હતું કે, સ્વાત જિલ્લામાં શોધાયેલ આ ગંધાર સંસ્કૃતિનું પહેલું મંદિર હતું.

ખોદકામ દરમિયાન મંદિરના સ્થળની પાસે છાવણીઓ અને મીનારા પણ મળી આવ્યા છે જ્યાં રક્ષક રહેતા હતા. ખલીકે જણાવ્યું હતું કે, સ્વાત જિલ્લામાં એક હજાર વર્ષ જુના પુરાતત્ત્વીય સ્થળો છે અને હિન્દુ શાહી કાળના નિશાન આ વિસ્તારમાં પ્રથમ વખત મળી આવ્યા છે. નિષ્ણાંતોએ મંદિરની પાસે પાણીનું તળાવ પણ શોધી કાઢ્યું છે. આ તળાવમાં ભક્તો અહીં પૂજા પહેલા સ્નાન કરતા હશા. આ વિસ્તારમાં પ્રથમ વખત હિન્દુ શાહી કાળના નિશાન મળ્યા છે.