અમેરિકા અશ્વેત પ્રદર્શનઃ પોલીસ સામે ઊભેલી મહિલાની તસવીર સોશિયલ મીડિયા પર છવાઈ

વોશિંગ્ટનઃ અમેરિકામાં અશ્વેતોના ચાલી રહેલા જબરદસ્ત વિરોધ પ્રદર્શન વચ્ચે એક તસવીર વાઇરલ થઈ છે, જે સોશિયલ મીડિયા પર ઘણી ચર્ચાનો વિષય બની છે. અમેરિકામાં કેટલાક દિવસોથી પોલીસ દ્વારા કેટલાક અશ્વેતોને મારવામાં આવ્યા બાદ તણાવનો માહોલ સર્જાયો છે. થોડા દિવસ પહેલાં થયેલી હિંસામાં પાંચ પોલીસ કર્મચારીઓનાં પણ મોત થયાં હતાં.

જે મહિલાની તસવીર ચર્ચામાં છે તે ‘રોયટર્સ’ના ફોટોગ્રાફર જોનાથન બાકમને ખેંચી છે. આ તસવીરમાં એક અશ્વેત મહિલા રસ્તા પર એન્ટી રાયટ્સ સ્ક્વોડના પોલીસ કર્મચારીઓ સામે ઊભી છે અને બે પોલીસવાળા તેની ધરપકડ કરવાની તૈયારી બતાવી રહ્યા છે. તસવીર અમેરિકાના લુસિયાનાના બેટન રુજની છે.

સોશિયલ મીડિયા પર લોકો આ તસવીરની ઘણી પ્રશંસા કરી રહ્યા છે. તેની સરખામણી એવી કેટલીક તસવીરો સાથે થઈ રહી છે, જેમાં કોઈ એક વ્યક્તિ એકલી વિરોધની પ્રતીક રહી ચૂકી હોય.