લદાખમાં તણાવ વચ્ચે પાકિસ્તાન જશે જિનપિંગ, વધી શકે છે ભારતની ચિંતા

રાષ્ટ્ર પ્રમુખ બન્યા બાદ જિનપિંગનો આ બીજો પાકિસ્તાન પ્રવાસ છે. આ પહેલા તેઓ 2015મા ઈસ્લામાબાદના પ્રવાસે ગયા હતા. જિનપિંગનો પાકિસ્તાન પ્રવાસ પહેલા જૂનમાં હતો પરંતુ કોરોના વાયરસના કારણે આ પ્રવાસ રદ કરી દેવામાં આવ્યો હતો. વર્ષ 2020મા ચીનના રાષ્ટ્ર પ્રમુખનો આ બીજો પ્રવાસ હશે. અગાઉ તેઓ જાન્યુઆરીમાં મ્યાનમારના પ્રવાસે ગયા હતા.

ચીનના સરકારી મીડિયા અનુસાર જિનપિંગના પાકિસ્તાન પ્રવાસને લઈને હજી કોઈ ચોક્કસ તારીખ જાહેર કરાઈ નથી. આ પ્રવાસને ઐતિહાસિક બનાવવા માટે પાકિસ્તાન અને ચીનના અધિકારીઓ સતત બેઠક યોજી રહ્યા છે. 2015મા જ્યારે જિનપિંગ પાકિસ્તાન ગયા હતા ત્યારે ચીન-પાકિસ્તાન ઈકોનોમી કોરિડોરને લઈને બંને દેશોમાં 51 કરાર થયા હતા.

દક્ષિણ એશિયામાં ચીનના વધતા પ્રભાવ અને ભારત સાથે બગડતા સંબંધો વચ્ચે ચીનના રાષ્ટ્ર પ્રમુખનો પાકિસ્તાન પ્રવાસ ભારત માટે ઘણો મહત્વનો હશે. ચીન ફક્ત લદાખ અને અક્સાઈ ચીનમાં જ નહીં પરંતુ પાકિસ્તાન અધિકૃત કાશ્મીરમાં પણ પાકિસ્તાન સાથે મળીને ઘણી યોજનાઓ પર કામ કરી રહ્યું છે. તેવામાં જિનપિંગના પાકિસ્તાન પ્રવાસથી ભારતની ચિંતાઓ વધી શકે છે.