Sri Lanka Crisis: શ્રીલંકામાં ભયાનક આર્થિક સંકટ, પેટ્રોલનું જહાજ આવીને ઉભું છે પણ ચુકવવા માટે પૈસા નથી

કોલંબો- ભારતનો પાડોશી દેશ શ્રીલંકા અત્યારે ભયંકર આર્થિક કટોકટીનો સામનો કરી રહ્યો છે. બુધવારના રોજ શ્રીલંકા દ્વારા જાહેર કરવામાં આવ્યું કે, દેશના સમુદ્રી વિસ્તારમાં લગભગ બે મહિનાથી પેટ્રોલ ભરેલા જહાજ ઉભા છે પરંતુ ચુકવણી કરવા માટે તેમની પાસે વિદેશી મુદ્રા નથી. માટે સરકાર દ્વારા નાગરિકોને અપીલ કરવામાં આવી છે કે ઈંધણ માટે લાઈનમાં ઉભા રહીને રાહ જોવાની જરૂર નથી. જો કે સરકાર તરફથી ખુલાસો કરવામાં આવ્યો છે કે દેશ પાસે ડીઝલનો પૂરતો સ્ટોક છે.

આર્થિક તંગીમાં સળગી રહી છે 'રાવણની લંકા', અશોક વાટિકા પણ આવી ઝપેટમાં
વીજળી અને ઉર્જા મંત્રી કંચના વિજેસેકેરાએ સંસદને જણાવ્યું કે, 28મી માર્ચથી શ્રીલંકાના દરિયાઈ ક્ષેત્રમાં પેટ્રોલ ભરેલું એક જહાજ ઉભું છે. ઓનલાઈન પોર્ટલ ન્યુઝ ફર્સ્ટના રિપોર્ટ અનુસાર, સરકાર દ્વારા પૃષ્ટિ કરવામાં આવી છે કે તેઓ પેટ્રોલની તંગીનો સામનો કરી રહ્યા છે. મંત્રીએ જણાવ્યું કે, પેટ્રોલના જહાજનું પેમેન્ટ કરવા માટે અમારી પાસે અમેરિકન ડોલર નથી. વધુમાં તેમણે જણાવ્યું કે, જાન્યુઆરી 2022માં કરવામાં આવેલી ડિલિવરીના 5.3 કરોડ ડોલર પણ ચૂકવવાના બાકી છે.

મંત્રીએ જણાવ્યું કે, શિપિંગ કંપની દ્વારા કહેવામાં આવ્યું છે કે જ્યાં સુધી બન્ને પેમેન્ટ પૂરા કરવામાં નહીં આવે ત્યાં સુધી જહાજ છોડવામાં નહીં આવે. સેન્ટ્રલ બેન્ક ઓફ શ્રીલંકા દ્વારા આશ્વાસન આપવામાં આવ્યું છે કે તેઓ પાછલું પેમેન્ટ ચૂકવી આપશે. આ આશ્વાસન મેળવ્યા પછી કંપનીએ કહ્યું છે કે જ્યારે બાકીનું પેમેન્ટ ચૂકવવામાં આવશે ત્યારે તે અત્યારે ઉપલબ્ધ સ્ટોકને રીલિઝ કરશે. મંત્રીએ જણાવ્યું કે, મંત્રાલય બુધવાર અથવા ગુરુવારના રોજ પ્રયત્ન કરશે કે આ જહાજનો સ્ટોક મળી શકે. પરંતુ અમે લોકોને વિનંતી કરીએ છીએ કે ઈંધણની રાહ જોવાનું છોડી દો. ડીઝલનો કોઈ મુદ્દો નથી, પરંતુ પેટ્રોલની લાઈનમાં ઉભા રહેવાનું ટાળો. અમારી પાસે પેટ્રોલનો મર્યાદિત જથ્થો છે અને અમે આ મર્યાદિત જથ્થાને જરૂરી સેવાઓ જેમકે એમ્બ્યુલન્સને પહોંચાડવાનો પ્રયત્ન કરીએ છીએ.

China Plane Crash: અકસ્માત નહીં, જાણીજોઈને ક્રેશ કરાવવામાં આવ્યુ હતું પ્લેન? 132 લોકોનાં થયા હતા મોત
ઉર્જા મંત્રીએ આ સ્થિતિ બદલ માફી પણ માંગી હતી. તેમણે કહ્યું કે, અમે આ માટે માફી માંગીએ છીએ. આ સિવાય સંગ્રહખોરી કરવાનું ટાળવાની પણ અપીલ કરી હતી. વિજેસેકેરાએ જણાવ્યું કે, તમામ ફિલિંગ સ્ટેશનો પર પેટ્રોલ વિતરણ કરવામાં શુક્રવારથી લગભગ 3 દિવસ લાગશે.